ایجنسیز
سرینگر؍۲۷؍اپریل
مرکزی وزیر شیوراج سنگھ چوہان منگل کے روز پردھان منتری گرام سڑک یوجنا(پی ایم جی ایس وائی)کے تحت بیچ۲ے تحت۳۳۰نئی سڑکوں کے پروجیکٹوں کا آغاز کریں گے، جو۱۶۰۰کلومیٹر پر محیط ہوں گے اور جن پر۳۵۵۰ کروڑ روپے لاگت آئے گی۔
حکام کے مطابق پی ایم جی ایس وائی چہارم کے تحت بیچ۲جموں و کشمیر میں ترقیاتی عمل کو مزید تیز کرے گا، جس کے ذریعے۳۳۰نئی سڑکیں تعمیر کی جائیں گی اور خطے کے۳۶۳رہائشی بستیوں کو فائدہ پہنچے گا۔
ایک سرکاری ترجمان نے بتایا کہ جموں و کشمیر اپنی ترقی کے سفر میں ایک اہم سنگِ میل عبور کرنے جا رہا ہے، کیونکہ مرکزی وزیر زراعت و کسان بہبود اور دیہی ترقی سرینگر کے ایس کے آئی سی سی میں ایک خصوصی تقریب کے دوران پی ایم جی ایس وائی چہارم، بیچ-۲کا آغاز کریں گے۔
اس تقریب میں وزیراعلیٰ عمر عبداللہ اور نائب وزیر اعلیٰ سریندر کمار چودھری کی بھی شرکت متوقع ہے۔
انہوں نے بتایا کہ سال۲۰۰۰سے اب تک جموں و کشمیر میں پی ایم جی ایس وائی کے تحت۳۳۲۸ سڑکیں تعمیر کی جا چکی ہیں، جس کے نتیجے میں۱۹ہزار۸۵۱کلومیٹر طویل سڑک نیٹ ورک اور۲۵۷پل وجود میں آئے ہیں۔
چوہان نے کہا کہ وزیر اعظم نریندر مودی کی قیادت میں یہ اقدام اس بات کی عکاسی کرتا ہے کہ حکومت صرف اعلانات تک محدود نہیں بلکہ زمینی سطح پر ترقی کو یقینی بنا رہی ہے۔انہوں نے اس بات پر زور دیا کہ حکومت کی ترجیح یہ ہے کہ سڑکیں، سہولیات اور دیگر بنیادی خدمات دور دراز دیہات تک بھی پہنچیں۔
مرکزی وزیر نے مزید کہا کہ بنیادی ڈھانچے کی ترقی کو ایک اہم ذریعہ سمجھا جا رہا ہے تاکہ جموں و کشمیر کو قومی ترقی کے دھارے میں مزید مضبوطی سے شامل کیا جا سکے۔ (ایجنسیاں)
