جموں؍۲۳؍اپریل
عمر عبداللہ نے جمعرات کو کہا کہ معاشرے کے مختلف طبقات کے جائز مسائل کو ترجیحی بنیادوں پر حل کیا جائے گا اور حکومت جموں و کشمیر میں جامع اور متوازن ترقی کے لیے پُرعزم ہے۔
یہ یقین دہانی وزیر اعلیٰ نے مختلف عوامی اور تجارتی وفود سے ملاقاتوں کے دوران کرائی، جنہوں نے ترقیاتی اور صنعتی نوعیت کے متعدد مسائل پیش کیے اور پالیسی تعاون جاری رکھنے کی درخواست کی۔
جموں چیمبر آف کامرس اینڈ انڈسٹری کے صدر ارون گپتا کی قیادت میں ایک وفد نے تجارت اور کاروبار سے متعلق اہم امور اٹھائے۔ وفد نے کاروباری سرگرمیوں کو متاثر کرنے والے مسائل کی نشاندہی کرتے ہوئے معاشی ترقی کے فروغ اور نظام کو بہتر بنانے کیلئے سازگار ماحول کی ضرورت پر زور دیا۔
صنعتی نمائندوں نے دربار موو کی بحالی پر وزیر اعلیٰ کا شکریہ ادا کرتے ہوئے کہا کہ اس اقدام سے خطے میں معاشی سرگرمیوں، خصوصاً بازاروں، کرایہ کی املاک، ہوٹلوں اور ٹرانسپورٹ کے شعبے میں نئی جان آئی ہے۔
ایک اور وفد، پیر پنجال ویلفیئر اینڈ ڈیولپمنٹ ٹرسٹ کے وویک ورما کی قیادت میں، خطے کی ترقیاتی ترجیحات کو اجاگر کرتے ہوئے وزیر اعلیٰ سے ملا۔ وفد نے پیر پنجال خطے کی سیاحتی صلاحیت کو بروئے کار لانے کے لیے مربوط اور پائیدار اقدامات پر زور دیا۔
وفد کے ارکان نے صحت اور تعلیم کے ڈھانچے کو مضبوط بنانے، پینے کے صاف پانی کی فراہمی یقینی بنانے اور خصوصاً سرحدی علاقوں کے نوجوانوں کیلئے روزگار کے مواقع بڑھانے کی ضرورت کو بھی اجاگر کیا۔
وزیر اعلیٰ نے تمام وفود کو یقین دلایا کہ ان کے مسائل کو ترجیحی بنیادوں پر حل کیا جائے گا اور حکومت جموں و
کشمیر کے تمام خطوں میں متوازن اور جامع ترقی کو یقینی بنانے کے لیے پُرعزم ہے۔
ڈی آئی پی آر
