سرینگر؍۱۹ مارچ
جمعرات کی شام شوال کا چاند نظر نہیں آیا، جس کے بعد جموں و کشمیر بھر میں عیدالفطر اب ہفتہ،۲۱ مارچ۲۰۲۶کو منائی جائے گی۔
مفتی اعظم‘ مفتی ناصر اسلام نے کہا’’خطے کے کسی بھی حصے سے چاند نظر آنے کی کوئی مصدقہ اطلاع موصول نہیں ہوئی، لہٰذا عیدالفطر ہفتہ کو منائی جائے گی‘‘۔
اسلام نے کہا کہ اس کے ساتھ ہی مقدس مہینہ رمضان۳۰دن مکمل کرے گا۔ انہوں نے عوام کو مبارکباد پیش کرتے ہوئے خطے میں امن، ہم آہنگی اور خوشحالی کے لیے دعا بھی کی۔
وادی بھر میں مسلمان اب ہفتہ کے روز مذہبی جوش و خروش کے ساتھ عید منانے کی تیاریوں میں مصروف ہیں۔ عید کی نماز عیدگاہوں اور مساجد میں ادا کی جائے گی، جبکہ اس موقع سے قبل بازاروں میں بھی خاصی چہل پہل دیکھی جا رہی ہے۔
دریںا ثنا ملک کی کسی بھی تنظیم نے چاند کی رویت کا اعلان نہیں کیا ہے، لہذا شوال کی پہلی تاریخ بروز ہفتہ۲۱مارچ ہوگی اور عید کی نماز۲۱مارچ کو ادا کی جائے گی۔
یہ اطلاع مرکزی دارالقضا امارت شرعیہ بہار، اڑیسہ، جھارکھنڈ، پھلواڑی شریف پٹنہ،رؤیت ہلال کمیٹی امارت شرعیہ ہند، مرکزی چاند کمیٹی فرنگی محل لکھنو اور دیگر تنظیموں نے دی ہے۔
دہلی اور آس پاس موسم ابر آلود ہونے کے سبب چاند نہیں دیکھا گیا۔ آج بعد نماز مغرب رؤیت ہلال کمیٹی امارت شرعیہ ہند کی میٹنگ مولانا مفتی ذکاوت حسین قاسمی نائب امیر شریعت صوبہ دہلی کے زیر صدارت، امارت شرعیہ ہند کے مرکزی دفتر میں منعقد ہوئی۔چاند دیکھنے کا اہتمام کیا گیا۔ دہلی میں مطلع ابر آلود ہے،چاند نظر نہیں آیا۔ ملک کے بیشتر مقامات سے رابطہ کیا گیا، کسی جگہ سے روئیت کی اطلاع موصول نہیں ہوئی۔
مرکزی دارالقضا امارت شرعیہ بہار، اڑیسہ، جھارکھنڈ، پھلواڑی شریف پٹنہ کے قاضی انظار عالم قاسمی نے اعلان کیا ہے کہ پٹنہ اور دیگر شاخوں نے میں چاند دیکھنے کا اہتمام کیا مگر کہیں سے بھی رویت کی اطلاع موصول نہیں ہوئی۔ لہذا۳۰کی رویت کا اعتبار کرتے ہوئے کل بروز جمعہ ماہ رمضان کی ۳۰تاریخ ہوگی اور بروز۲۱مارچ کو عیدالفطر کی نماز ادا کی جائے گی۔ امارت شرعیہ ہند نے بھی عدم رویت کا اعلان کیا ہے۔ اس کے علاوہ شاہی جامع مسجد فتح پوری رویت ہلال کمیٹی، مسجد فتح پوری،دہلی اور ملک کی مختلف رویت ہلال کمییٹوں نے چاند نہ دیکھے جانے کی اطلاع دی ہے۔
دریں اثناء مرکزی جمعیت اہل حدیث ہند کی مرکزی اہل حدیث رؤیت ہلال کمیٹی دہلی سے جاری اخباری بیان کے مطابق بعد نماز مغرب اہل حدیث کمپلیکس، ابوالفضل انکلیو،جامعہ نگر، نئی دہلی میں مرکزی اہل حدیث رؤیت ہلال کمیٹی دہلی کی ایک اہم میٹنگ منعقد ہوئی اور رؤیت ہلال سلسلے میں حسب سابق ملک کی اکثرریاستوں کے ذمہ داروں اور ملی تنظیموں سے بذریعہ فون رابطے کیے گئے۔ مگر ملک کے کسی بھی حصہ سے رؤیت ہلال کی کوئی خبر موصول نہیں ہوئی۔
