ڈی آئی پی آر
جموں؍۷ مارچ
ڈائریکٹر اطلاعات و تعلقاتِ عامہ نتیش راجورا نے معروف صحافی اور اردو روزنامہ ندائے مشرق کے چیف ایڈیٹر عبدالرشید شاہ کے انتقال پر گہرے دکھ اور افسوس کا اظہار کیا ہے، جو آج مختصر علالت کے بعد انتقال کر گئے۔
اپنے تعزیتی پیغام میں ڈائریکٹر اطلاعات نے مرحوم عبدالرشید شاہ کو کشمیر کی صحافتی برادری کی ایک باوقار شخصیت قرار دیتے ہوئے کہا کہ انہوں نے کئی دہائیوں تک صحافت کے میدان میں نمایاں خدمات انجام دیں۔ انہوں نے سوگوار خاندان کے ساتھ دلی ہمدردی اور تعزیت کا اظہار کیا اور مرحوم کی مغفرت کے لیے دعا کی، ساتھ ہی اہلِ خانہ کے لیے اس صدمے کو برداشت کرنے کی توفیق مانگی۔
ادھر محکمہ اطلاعات و تعلقاتِ عامہ (ڈی آئی پی آر) کے ملازمین نے بھی سینئر صحافی عبدالرشید شاہ کے انتقال پر گہرے رنج و غم کا اظہار کیا۔
ملازمین نے محکمہ اطلاعات کے ساتھ مرحوم کی وابستگی کو یاد کرتے ہوئے صحافت کے میدان میں ان کی مثالی خدمات کو خراجِ عقیدت پیش کیا۔ انہوں نے کہا کہ عبدالرشید شاہ کا انتقال کشمیر کی صحافتی برادری کے لیے ایک بڑا نقصان ہے۔
ملازمین نے مرحوم عبدالرشید شاہ کے اہلِ خانہ سے دلی تعزیت کا اظہار کرتے ہوئے مرحوم کے لیے مغفرت اور پسماندگان کے لیے صبرِ جمیل کی دعا کی۔
