ہندوستان اور فن لینڈ کے درمیان مختلف شعبوں میں تعاون کو مضبوط بنانے کی بے پناہ صلاحیت: مرمو

نئی دہلی، 05 مارچ (یواین آئی) صدر دروپدی مرمو نے کہا ہے کہ ہندوستان اور فن لینڈ کے درمیان مختلف شعبوں میں تعاون کو مضبوط بنانے کی بے پناہ صلاحیت موجود ہے۔ محترمہ مرمو نے ہندوستان کے دورے پر آئے فن لینڈ کے صدر الیگزینڈر اسٹب کے ساتھ جمعرات کو راشٹرپتی بھون میں ملاقات کے دوران یہ بات کہی۔
انہوں نے صدر اسٹب کا خیرمقدم کرتے ہوئے کہا کہ اس سال کے رائے سینا ڈائیلاگ میں بطورِ مہمانِ خصوصی ان کی موجودگی ہندوستان کے لیے باعثِ فخر ہے۔ انہوں نے یقین ظاہر کیا کہ موجودہ عالمی حالات پر ان کے خیالات تمام شرکاء کے لیے نہایت اہم اور مفید ہوں گے۔
صدر نے کہا کہ ہندوستان فن لینڈ کو ایک اہم اور قابلِ اعتماد شراکت دار کے طور پر دیکھتا ہے اور دونوں ممالک کے تعلقات باہمی اعتماد اور مشترکہ جمہوری روایات پر مبنی ہیں۔ دونوں رہنماؤں نے اس بات پر اتفاق کیا کہ حالیہ برسوں میں ہندوستان-فن لینڈ تعلقات جدت، صاف ٹیکنالوجی، تعلیم اور اقتصادی تعاون جیسے اہم ستونوں کی بنیاد پر ایک متحرک شراکت داری کے طور پر ترقی کر رہے ہیں۔ انہوں نے یقین ظاہر کیا کہ حال ہی میں اعلان کردہ ہند-یورپی یونین آزاد تجارتی معاہدہ تجارت اور سرمایہ کاری کے تعلقات کو نئی رفتار دے گا۔
محترمہ مرمو نے کہا کہ فن لینڈ کوانٹم ٹیکنالوجی سے لے کر 6 جی تک جدید ترین ڈیجیٹل ٹیکنالوجیوں میں عالمی رہنما ہے۔ انہوں نے ہندوستان کی ترقی کے سفر میں فن لینڈ کی کمپنیوں کے کردار کی تعریف کی۔انہوں نے کہا کہ کئی ہندوستانی کمپنیاں فن لینڈ میں سرگرم ہیں اور ہزاروں ہندوستانی، خاص طور پر آئی ٹی پروفیشنلز، فن لینڈ کی معیشت میں اہم کردار ادا کر رہے ہیں۔ یہ صورتحال ان شعبوں میں دونوں ممالک کے درمیان گہرے تعاون کی بے پناہ صلاحیت فراہم کرتی ہے۔