چاہے یوکرین ہو یا مغربی ایشیا، ہم تنازعات کے جلد خاتمے ‘ امن کے قیام کی ہر کوشش کی حمایت جاری رکھیں گے:مودی
آیت اللہ خامنہ ای کی ہلاکت ‘خارجہ سیکریٹری دہلی میں ایرانی سفارتخانہ گئے ‘مقتول رہنما کی ہلاکت پر تعزیت کا اظہار کیا
(ایجنسیز )
نئی دہلی؍۵مارچ
وزیر اعظم نریندر مودی نے جمعرات کو مغربی ایشیا اور یوکرین میں جاری تنازعات کے ’جلد خاتمے‘ پر زور دیتے ہوئے کہا کہ کسی بھی مسئلے کو فوجی تصادم کے ذریعے حل نہیں کیا جا سکتا۔
مودی نے یہ بات فن لینڈ کے صدر الیگزینڈر اسٹب کے ساتھ وسیع مذاکرات کے بعد کہی۔
وزیر اعظم نے کہا’’بھارت اور فن لینڈ دونوں قانون کی حکمرانی، مکالمے اور سفارت کاری پر یقین رکھتے ہیں۔ ہم اس بات پر متفق ہیں کہ کوئی بھی مسئلہ صرف فوجی تنازع کے ذریعے حل نہیں کیا جا سکتا‘‘۔
مودی نے کہا’’چاہے یوکرین ہو یا مغربی ایشیا، ہم تنازعات کے جلد خاتمے اور امن کے قیام کی ہر کوشش کی حمایت جاری رکھیں گے‘‘۔
مذاکرات کے دوران دونوں فریقین نے ڈیجیٹلائزیشن اور پائیداری کے شعبوں میں بھارت اور فن لینڈ کے تعلقات کو اسٹریٹجک شراکت داری کا درجہ دینے پر بھی اتفاق کیا۔
وزیر اعظم نے کہا’’مصنوعی ذہانت سے لے کر۶جی ٹیلی کام تک، صاف توانائی سے لے کر کوانٹم کمپیوٹنگ تک، یہ شراکت داری کئی جدید ٹیکنالوجی کے شعبوں میں ہمارے تعاون کو نئی رفتار اور توانائی فراہم کرے گی‘‘۔
مودی نے کہا کہ بھارت اور یورپی یونین کے درمیان مجوزہ آزاد تجارتی معاہدہ بھارت اور فن لینڈ کے درمیان تجارتی تعلقات کو مزید مضبوط کرے گا۔
وزیر اعظم نے کہا’’یہ معاہدہ بھارت اور فن لینڈ کے درمیان تجارت، سرمایہ کاری اور ٹیکنالوجی کے تعاون کو مزید فروغ دے گا‘‘۔
فن لینڈ کے صدر اسٹب بدھ کے روز چار روزہ دورے پر بھارت پہنچے ہیں، جس کا مقصد تجارت، سرمایہ کاری اور اہم ٹیکنالوجی سمیت مختلف شعبوں میں دوطرفہ تعاون کو مزید مضبوط بنانا ہے۔
اس دوران بھارت نے ایران کے سپریم لیڈر آیت اللہ علی خامنہ ای کے انتقال پر تعزیت کا اظہار کیا ہے۔ خارجہ سکریٹری وکرم مسری نے آج نئی دہلی میں ایران کے سفیر سے ملاقات کی اور خامنہ ای کے انتقال پر تعزیتی کتاب میں اپنے تاثرات درج کیے۔
آیت اللہ خامنہ ای کا اتوار کے روز انتقال ہوا تھا، جو تہران میں امریکہ اور اسرائیل کے فضائی حملوں کے چند گھنٹوں بعد پیش آیا۔
یہ پیش رفت اس وقت سامنے آئی ہے جب ایران نے اعلان کیا ہے کہ آبنائے ہرمز تمام جہازوں کے لیے کھلی رہے گی، تاہم امریکہ، اسرائیل اور یورپی یونین سے تعلق رکھنے والے جہازوں کو اس سے استثنا حاصل نہیں ہوگا۔
وزیر خارجہ ایس جے شنکر نے بھی سوشل میڈیا پلیٹ فارم’ایکس‘ پر ایک بیان میں بتایا کہ انہوں نے آج دوپہر ایرانی وزیر خارجہ سید عباس عراقچی کے ساتھ ٹیلی فون پر بات چیت کی۔
بھارت کے اس اقدام کو نئی دہلی کے موقف میں ایک محتاط تبدیلی کے طور پر دیکھا جا رہا ہے۔ اس سے قبل حکومت نے ان فضائی حملوں کی مذمت نہیں کی تھی جن میں خامنہ ای کی موت واقع ہوئی اور اپوزیشن کی جانب سے باضابطہ بیان دینے کے مطالبات کے باوجود خاموشی اختیار کی گئی تھی۔
بعد ازاں وزیر اعظم نریندر مودی نے مشرق وسطیٰ کی صورتحال پر تشویش کا اظہار کرتے ہوئے کہا کہ بھارت ہمیشہ ایسے تنازعات کے حل کے لیے مکالمے اور سفارت کاری پر زور دیتا رہا ہے۔
نئی دہلی کا ردعمل بڑی حد تک دیگر عالمی طاقتوں کے مؤقف سے مطابقت رکھتا ہے، کیونکہ بیشتر ممالک نے خامنہ ای کی ہلاکت پر تعزیت کا اظہار نہیں کیا، جبکہ صرف روس اور چین نے باقاعدہ تعزیتی پیغامات جاری کیے۔
ادھر ایران کی پاسدارانِ انقلاب نے اعلان کیا ہے کہ آبنائے ہرمز امریکہ، اسرائیل، یورپ اور ان کے مغربی اتحادیوں کے جہازوں کے لیے بند کر دی گئی ہے۔ انہوں نے خبردار کیا کہ امریکہ، اسرائیل، یورپ یا ان کے حامیوں سے تعلق رکھنے والا کوئی بھی جہاز اگر اس آبی گذرگاہ میں نظر آیا تو اسے نشانہ بنایا جائے گا۔
اس سے قبل اپوزیشن جماعتوں نے ایران کے ساتھ بھارت کے طویل تعلقات کا حوالہ دیتے ہوئے حکومت کے مؤقف پر تنقید کی تھی۔
ایک وقت تھا جب بھارت اپنی تیل کی ضروریات کا تقریباً۱۳فیصد ایران سے حاصل کرتا تھا اور دونوں ممالک کے درمیان قابلِ ذکر تجارتی روابط تھے، تاہم۲۰۱۸میں امریکہ کے ایران کے ساتھ جوہری معاہدے سے دستبردار ہونے کے بعد عائد پابندیوں کے باعث یہ تجارت نمایاں طور پر کم ہو گئی۔
دوسری جانب، این ڈی اے حکومت کے برسراقتدار آنے کے بعد بھارت نے اسرائیل کے ساتھ اپنے تعلقات کو بھی مضبوط بنایا ہے اور اب تل ابیب کے ساتھ اس کے اسٹریٹجک، معاشی اور عسکری تعلقات کافی مضبوط ہو چکے ہیں۔۲۰۱۷میں وزیر اعظم نریندر مودی اسرائیل کا دورہ کرنے والے پہلے بھارتی وزیر اعظم بنے تھے۔
ماہرین کے مطابق حالیہ موقف کو ایران اور مشرق وسطیٰ کے دیگر ممالک کے حوالے سے بھارت کی سابقہ پالیسی سے کسی حد تک انحراف اور امریکہ کے مزید قریب جانے کے طور پر بھی دیکھا جا رہا ہے۔
ادھر کانگریس کی سینئر رہنما سونیا گاندھی نے حکومت کے موقف پر تنقید کرتے ہوئے کہا کہ جب کسی غیر ملکی رہنما کے ہدفی قتل پر ہمارا ملک خودمختاری اور بین الاقوامی قانون کے دفاع میں واضح مؤقف اختیار نہیں کرتا تو اس سے خارجہ پالیسی کی سمت اور ساکھ پر سنجیدہ سوالات اٹھتے ہیں۔
سونیا نے کہا کہ بھارت طویل عرصے سے ’وسودھیو کٹمبکم’ یعنی ’دنیا ایک خاندان ہے‘کے نظریے کی بات کرتا آیا ہے۔ ان کے مطابق یہ صرف سفارتی نعروں تک محدود نہیں ہونا چاہیے بلکہ اس کا مطلب انصاف، تحمل اور مکالمے کے لیے عملی وابستگی بھی ہونا چاہیے، خاص طور پر ایسے وقت میں جب عالمی نظام دباؤ کا شکار ہو۔
