وزیر اعظم مودی کی اعلیٰ سطحی سفارتی میٹنگوں میں شرکت

شمولیاتی اے آئی، اقوام متحدہ کی اصلاحات اوراسٹریٹجک شراکت داری پر زوردیا
نئی دہلی، 20 فروری (یو این آئی)
وزیر اعظم نریندر مودی نے جمعہ کے روز قومی دارالحکومت میں منعقدہ اعلیٰ سطح کی میٹنگوں کے دوران مصنوعی ذہانت (اے آئی) کو جامع اور ترقیاتی مقاصد کے لیے وقف کرنے کےہندوستان کے عزم پر زور دیا، نیز سری لنکا اور سلوواکیہ کے ساتھ اہم دوطرفہ شراکت داریوں کو بھی آگے بڑھایا۔
اقوام متحدہ کے سکریٹری جنرل انتونیو گوتریس کے ساتھ ملاقات میں وزیر اعظم نے اے آئی کی عالمی گورننس اور اس بات کو یقینی بنانے کی ضرورت پر تبادلۂ خیال کیا کہ اس سے انسانیت کے تمام طبقات مستفید ہوں۔ وزیر اعظم مودی نے سوشل میڈیا پلیٹ فارم ایکس پر ایک پوسٹ میں کہا، اقوام متحدہ کے سکریٹری جنرل مسٹر انتونیو گوتریس کے ساتھ ملاقات کے دوران، ہم نے اے آئی کو سب کے لیے جامع بنانے اور اس سلسلے میں اقوام متحدہ کے تعمیری کردار ادا کرنے پر بات کی۔ انہوں نے اس بات کا بھی اعادہ کیا ک بہتر کرۂ ارض کے لیے اے آئی کے استعمال کی خاطر کی جانے والی کسی بھی کوشش میں ہندوستان کا تعاون شامل رہے گا۔
ان مذاکرات میں اقوام متحدہ کے نظام کی طویل عرصے سے زیر التوا اصلاحات، بالخصوص ترقی پذیر ممالک کی آواز کو مضبوط بنانے کی ضرورت پر بھی بات کی گئی۔ وزیر اعظم نے کہا کہ ہم نے اقوام متحدہ کی اصلاحات، خاص طور پر عالمی خطۂ جنوب کو زیادہ نمائندگی دینے پر بھی خیالات کا تبادلہ کیا۔
ہندوستان مستقل طور پر عالمی اداروں کی تنظیمِ نو کی وکالت کرتا رہا ہے تاکہ وہ عصری جغرافیائی سیاسی حقیقتوں کی عکاسی کر سکیں، جس میں اقوام متحدہ کی سلامتی کونسل کی توسیع اور ابھرتی ہوئی معیشتوں اور ترقی پذیر ممالک کی بہتر نمائندگی شامل ہے۔
ایک علیحدہ ملاقات میں، وزیر اعظم مودی نے سری لنکا کے صدر انورا کمارا دسانائیکے سے ملاقات کی اور اس بات چیت کو دوطرفہ دوستی کو مزید گہرا کرنے کی جانب ایک قدم قرار دیا۔
انہوں نے کہا کہ ایک قابلِ قدر پڑوسی کے ساتھ دوستی کو مضبوط بنا رہے ہیں! دہلی میں سری لنکا کے صدر انورا کمارا دسانائیکے سے مل کر بہت خوشی ہوئی۔
دونوں رہنماؤں نے حالیہ عرصہ میں ہندوستان اور سری لنکا کے تعلقات میں ہونے والی پیش رفت کا جائزہ لیا اور متعدد شعبوں میں مزید تعاون کے امکانا کا جائزہ لیا۔ وزیر اعظم مودی نے کہا، ہم نے حالیہ دنوں میں ہندوستان اور سری لنکا کے تعلقات میں ہونے والی پیش رفت کا جائزہ لیا۔ ہم نے توانائی، کنیکٹوٹی، انفراسٹرکچر، صحت کی دیکھ بھال، مہارت کی ترقی، ثقافت، نیلگوں معیشت اور دیگر شعبوں میں تعاون کے مواقع پر بھی تبادلۂ خیال کیا۔
ہندوستان اور سری لنکا دیرینہ تہذیبی، ثقافتی اور معاشی روابط رکھتے ہیں۔ حالیہ برسوں میں، نئی دہلی نے معاشی چیلنجوں کے دوران کولمبو کی مدد کرنے میں کلیدی کردار ادا کیا ہے، جبکہ دونوں ممالک نے بحری سلامتی، قابلِ تجدید توانائی اور علاقائی رابطوں میں تعاون بڑھانے کی کوشش کی ہے۔