رکن پارلیمنٹ رکی سنگکان کے انتقال پر مودی، برلا، کھڑگے، راہل گاندھی کا اظہار تعزیت

نئی دہلی، 20 فروری (یو این آئی)
وزیر اعظم نریندر مودی، لوک سبھا اسپیکر اوم برلا، راجیہ سبھا میں اپوزیشن لیڈر ملک ارجن کھڑگے اور لوک سبھا میں اپوزیشن لیڈر راہل گاندھی نے شیلانگ سے لوک سبھا کے رکن ڈاکٹر رکی اے جے سنگکان کے انتقال پر گہرے رنج و غم کا اظہار کیا ہے۔
مسٹر نریندر مودی نے جمعہ کے روز مسٹر رکی سنگکان کے انتقال پر تعزیت کا اظہار کرتے ہوئے سوشل میڈیا پر اپنے تعزیتی پیغام میں لکھا: "ڈاکٹر رکی اے جے سنگکان کے انتقال سے مجھے صدمہ ہوا ہے۔ انہیں میگھالیہ کے لوگوں کے لئے اپنی بے لوث خدمات کے لئے یاد رکھا جائے گا۔ میری ہمدردیاں اس مشکل وقت میں ان کے اہل خانہ، دوستوں اور حامیوں کے ساتھ ہیں۔”
مسٹر اوم برلا نے کہا، "ڈاکٹر سِنگکان کے بے وقت انتقال سے مجھے گہرا رنج ہوا ہے۔ ہم ڈیوٹی کے تئیں ان کی لگن کو انتہائی احترام اور امتنان کے ساتھ یاد رکھیں گے۔ ان کے خاندان اور اس ان کے انتقال سے سوگوار ہونے والے تمام لوگوں کے تئیں میری گہری تعزیت ہے۔ ان کی روح کو سکون ملے۔”
کانگریس صدر مسٹر ملک ارجن کھڑگے نے کہا کہ انہیں ڈاکٹر سنگکان کے انتقال سے بہت صدمہ ہوا ہے۔ میگھالیہ کے لوگوں اور تعلیم کے میدان میں ان کی خدمات کو ہمیشہ یاد رکھا جائے گا۔ میں ان کے خاندان، دوستوں اور حامیوں کے تئیں اپنی گہری تعزیت کا اظہار کرتا ہوں۔
مسٹر راہل گاندھی نے لکھا، "شیلانگ سے لوک سبھا کے رکن ڈاکٹر رکی اے جے سنگکان کے انتقال سے گہرا صدمہ ہوا ہے۔ عوامی خدمت اور میگھالیہ کے لوگوں کے تئیں ان کی وابستگی کو احترام کے ساتھ یاد رکھا جائے گا۔ ان کے خاندان، دوستوں اور حامیوں کے تئیں میری گہری تعزیت ہے۔”واضح رہے کہ شیلانگ سے لوک سبھا کے رکن اور وائس آف پیپلز پارٹی کے رہنما ڈاکٹر رکی اینڈریو جونز سنگکان کا جمعرات کے روز 54 سال کی عمر میں انتقال ہو گیا تھا۔ وہ کھیلتے ہوئے گر گئے تھے۔