لیفٹیننٹ جنرل مشرا کا کشتواڑ میں انسدادِ دہشت گردی گرڈ کا جائزہ

جموں: فوج کی وائٹ نائٹ کور کے جنرل آفیسر کمانڈنگ لیفٹیننٹ جنرل پی کے مشرا نے پیر کو جموں و کشمیر کے ضلع کشتواڑ کا دورہ کر کے انسدادِ دہشت گردی گرڈ اور دستوں کی آپریشنل تیاریوں کا جائزہ لیا۔
مشرا نے تمام رینکس پر زور دیا کہ وہ ہر وقت چوکس اور مشن کے لیے تیار رہیں۔
وائٹ نائٹ کور نے سوشل میڈیا پلیٹ فارم ایکس پر بتایا’’جی او سی وائٹ نائٹ کور، جی او سی سی آئی ایف (ڈیلٹا) کے ہمراہ جموں و کشمیر کے عمومی علاقے کشتواڑ کا دورہ کیا جہاں تعینات یونٹس کی آپریشنل تیاریوں کا جائزہ لینے اور انسداد دہشت گردی گرڈ کا معائنہ کیا گیا‘‘۔
لیفٹیننٹ جنرل مشرا کے ہمراہ جنرل آفیسر کمانڈنگ کاؤنٹر انسَر جنسی فورس (ڈیلٹا) میجر جنرل اے پی ایس بال بھی موجود تھے۔ انہیں موجودہ سیکورٹی صورتحال اور سیکورٹی فریم ورک کو مزید مضبوط بنانے کے اقدامات کے علاوہ مختلف ایجنسیوں کے درمیان تال میل سے متعلق بریفنگ دی گئی۔