جموں: شری امرناتھ جی شرائن بورڈ کے۵۰ویں بورڈ اجلاس میں آج ’بابا برفانی‘ کے نام سے لیزر اور ساؤنڈ شو قائم کرنے کی منظوری دی گئی، جو سرینگر اور جموں دونوں مقامات پر منعقد ہوگا۔ یہ شو مرکز کے زیر انتظام علاقے کی روحانی تاریخ کو اجاگر کرنے کے لیے ثقافتی علامت کے طور پر بھی کام کرے گا۔
بورڈ نے اعلان کیا کہ۲۰۲۶کی یاترا کی پرتھم پوجا۲۹جون کو جیشٹھ پورنیما کے موقع پر ادا کی جائے گی۔ یاترا کی باقاعدہ شروعات کی تاریخ جلد طے کی جائے گی۔
اجلاس کی صدارت لیفٹیننٹ گورنر منوج سنہا نے کی، جو شری امرناتھ جی شرائن بورڈ کے چیئرمین بھی ہیں۔
بورڈ نے آئندہ۲۰۲۶یاترا کے لیے عقیدت مندوں کے روحانی تجربے اور سہولیات کو بہتر بنانے کے لیے کئی اہم اقدامات کی منظوری دی۔
شری امرناتھ جی شرائن بورڈ نے رجسٹرڈ یاتریوں، سروس فراہم کرنے والوں، اہلکاروں، موسمی کارکنوں اور پجاریوں کے حادثاتی بیمہ کو۵لاکھ روپے سے بڑھا کر۱۰لاکھ روپے کرنے کا فیصلہ کیا۔
بورڈ نے ایس اے ایس بی ملازمین کے لیے مختلف فلاحی اقدامات پر بھی غور و منظوری دی۔
لیفٹیننٹ گورنر نے حکام کو ہدایت دی کہ یاترا کے راستے میں مناسب بیت الخلا سہولیات کے لیے مقامات کی نشاندہی کی جائے۔
سنہا نے یاتریوں، سروس فراہم کرنے والوں اور سکیورٹی اہلکاروں کے لیے ٹریکس پر شیلٹر شیڈز اور بارش سے بچاؤ کے لیے پناہ گاہیں نصب کرنے کی بھی ہدایت دی۔
اجلاس میں جاری منصوبوں، یاترا سے متعلق معلومات کی تشہیر، ٹٹوؤں کے بیمہ، آن لائن اور پری پیڈ خدمات کی توسیع، یاتریوں کی رجسٹریشن، آفات سے نمٹنے کی تیاری، طبی سہولیات کی فراہمی، لنگر اور رضاکارانہ خدمات، ٹیلی کمیونیکیشن، گرڈ کنیکٹیویٹی، موسمی پیشگوئی نظام، سکیورٹی و نگرانی، خدمات کی ڈیجیٹل پری پیڈ سسٹم، دونوں راستوں کے حساس مقامات پر کریش بیریئرز اور سیفٹی ریلنگز کی تنصیب اور مختلف محکموں کی جانب سے جاری کاموں کی پیش رفت پر بھی تبادلہ خیال کیا گیا۔
بارڈر روڈز آرگنائزیشن کی جانب سے یاترا ٹریکس کی دیکھ بھال، بحالی اور ترقیاتی کاموں کا جائزہ لیتے ہوئے بورڈ کو بتایا گیا کہ بالٹل اور پہلگام دونوں راستوں پر ٹریک کی مناسب چوڑائی حاصل کرنے میں نمایاں پیش رفت ہوئی ہے۔
ڈاکٹر مندیپ کے بھنڈاری، چیف ایگزیکٹو آفیسر شری امرناتھ جی شرائن بورڈ نے آئندہ یاترا کے انتظامات پر تفصیلی پریزنٹیشن پیش کی۔
اجلاس میں شرائن بورڈ کے ارکان سوامی اودھیشانند گری جی مہاراج، پروفیسر کیلاش مہرا سادھو، کے کے شرما، کے این رائے، مکیش گرگ، ڈاکٹر شیلش رائنا، ڈاکٹر سمرِدھی بندرو، سریش ہوارے اور پروفیسر وشوامورتی شاستری شریک ہوئے۔
اٹل ڈلو، چیف سیکریٹری؛ شالین کبرہ، ایڈیشنل چیف سیکریٹری جل شکتی محکمہ؛ شیلندر کمار، ایڈیشنل چیف سیکریٹری پاور ڈیولپمنٹ محکمہ؛ نلین پربھات، ڈی جی پی؛ چندرکر بھارتی، پرنسپل سیکریٹری داخلہ؛ سنتوش ڈی ویدیا، پرنسپل سیکریٹری خزانہ؛ انتظامی سیکریٹریز؛ ڈویژنل کمشنر جموں؛ ڈویژنل کمشنر کشمیر؛ آئی جی پیز؛ ڈپٹی کمشنرز (گاندربل اور اننت ناگ)؛ ایڈیشنل سی ای او ایس اے ایس بی اور یو ٹی انتظامیہ، بی آر او اور شرائن بورڈ کے سینئر افسران نے بھی لوک بھون جموں میں بالمشافہ اور ورچوئل طور پر اجلاس میں شرکت کی۔
