ایجنسیز
جموں؍۱۲فروری
بارڈر سکیورٹی فورس(بی ایس ایف)اور پاکستان رینجرز نے جمعرات کو یہاں آر ایس پورہ سیکٹر میں بین الاقوامی سرحد کے ساتھ فلیگ میٹنگ کی، حکام نے بتایا۔
حکام کے مطابق یہ ملاقات بلیوچک بارڈر آؤٹ پوسٹ کے قریب فائرنگ کے ایک واقعہ پر پاکستان رینجرز کی درخواست پر منعقد ہوئی۔
حکام نے کہا کہ بی ایس ایف نے وضاحت کی کہ فائرنگ اس کے دائرہ اختیار میں طے شدہ تربیتی مشق کا حصہ تھی۔
حکام نے بتایا کہ میٹنگ خوشگوار ماحول میں ہوئی، جس میں دونوں جانب نے سرحد پر امن و استحکام برقرار رکھنے کے عزم کا اعادہ کیا۔ انہوں نے اس رابطے کو آپریشنل مسائل حل کرنے اور کسی بھی غلط فہمی سے بچنے کے قائم شدہ طریقۂ کار کا حصہ قرار دیا۔
