6.7فیصد:جموں و کشمیر میں بے روزگاری کی شرح قومی اوسط سے زیادہ 

سرینگر: جموں کشمیر حکومت نے پیر کے روز قانون ساز اسمبلی کو بتایا کہ مرکز کے زیر انتظام علاقے میں مجموعی بے روزگاری کی شرح اس وقت 6.7 فیصد ہے، جو قومی اوسط 3.5 فیصد سے نمایاں طور پر زیادہ ہے۔
یہ معلومات رکن اسمبلی مبارک گل کی جانب سے پوچھے گئے ستارہ سوال کے تحریری جواب میں فراہم کی گئیں۔
حکومت نے بتایا کہ پیریاڈک لیبر فورس سروے کے مطابق جموں و کشمیر میں۱۵برس اور اس سے زائد عمر کے افراد میں بے روزگاری کی شرح گزشتہ چند برسوں کے دوران اتار چڑھاؤ کا شکار رہی ہے اور مسلسل قومی اوسط سے زیادہ رہی ہے۔
ایوان کو مزید بتایا گیا کہ محکمہ روزگار نے مرکز کے زیر انتظام انتظامیہ کے تعاون سے مشن یووا کے تحت پورے یو ٹی میں ایک بنیادی سروے کیا۔
اس سروے میں۱۸سے۶۰برس کی عمر کے 4.73 لاکھ افراد کی نشاندہی ہوئی، جن میں سے تقریباً 46.8 فیصد نے بتایا کہ وہ’کام نہیں کر رہے لیکن کام کرنے کے خواہش مند ہیں‘ جس سے بالخصوص نوجوانوں میں روزگار کے چیلنجز کی شدت ظاہر ہوتی ہے۔
بے روزگاری سے نمٹنے کے لیے اٹھائے گئے اقدامات سے متعلق سوالات کے جواب میں حکومت نے کہا کہ روزگار پیدا کرنا، خاص طور پر نوجوانوں کے لیے، اولین ترجیح ہے۔ حکومت نے واضح کیا کہ توجہ صرف قلیل مدتی ملازمت فراہم کرنے پر نہیں بلکہ پائیدار معاشی ذرائع پیدا کرنے پر ہے تاکہ نوجوان ملازمت تلاش کرنے والوں کے بجائے ملازمت فراہم کرنے والے بن سکیں۔
اس تناظر میں مشن یووا کو ایک انقلابی اقدام قرار دیا گیا جس کا مقصد پورے جموں و کشمیر میں کاروباری سرگرمیوں کو فروغ دینا ہے۔ آغاز کے بعد سے اس مشن کو بھرپور ردعمل ملا ہے اور یووا پلیٹ فارم پر تقریباً۷۰ہزار درخواستیں موصول ہو چکی ہیں، جو نوجوانوں میں کاروبار پر مبنی روزگار کے بڑھتے رجحان کی عکاسی کرتی ہیں۔
ان میں سے تقریباً۵۲ہزار۸۷۵درخواست گزاروں کے تفصیلی پروجیکٹ رپورٹس اسمال بزنس ڈیولپمنٹ یونٹس کے ذریعے تیار کی گئی ہیں۔ بینکوں کی جانچ پڑتال کے بعد تقریباً۴۷ہزار۸۱۶درخواستوں کا جائزہ لیا گیا، جن میں سے۱۶ہزار۱۴۱کیسز منظور ہو چکے ہیں۔ حکومت نے بتایا کہ تقریباً۹۵۰۰درخواستیں اہلیت اور قرض سے متعلق مسائل کی وجہ سے مسترد ہوئیں، جبکہ باقی مختلف مراحل میں زیر تکمیل ہیں۔
حکومت نے مزید بتایا کہ منظور شدہ مستفیدین کو رہنمائی، تربیت اور سرپرستی فراہم کی گئی ہے۔ اب تک۷۳۰۰سے زائد کاروباری افراد تربیت مکمل کر چکے ہیں جبکہ کئی دیگر اس وقت صلاحیت سازی پروگراموں میں شریک ہیں۔
محکمہ محنت و روزگار نے گزشتہ دو مالی برسوں کے دوران مختلف خود روزگار اور کاروباری اسکیموں جن میں مشن یووا، ممکن، تیجسوِنی، اسپرنگ انٹرپرینیورشپ اسکیم اور ویمن انٹرپرینیورشپ پروگرام شامل ہیں کے تحت مستفید ہونے والوں کی سال وار تفصیلات بھی پیش کیں۔
حکومت نے اعادہ کیا کہ بے روزگاری کم کرنے اور نوجوانوں کو پیداواری معاشی سرگرمیوں میں شامل کرنے کے لیے ایک جامع روزگار پالیسی اور روڈ میپ ’مشن یووا:خواہش سے کاروبار تک جموں و کشمیر کے روزگار منظرنامے کی تبدیلی‘ تیار کیا گیا ہے۔
یہ جواب ایوان میں وزیر انچارج محکمہ محنت و روزگار نے پیش کیا، جنہوں نے کہا کہ مشن پر مبنی حکمت عملی کا مقصد مرکز کے زیر انتظام علاقے میں ہمہ گیر ترقی اور طویل مدتی روزگار پیدا کرنا ہے۔