ہماری قدیم ثقافت نے کبھی تقسیم کو فروغ نہیں دیا:سنہا

ہری دوار: لیفٹیننٹ گورنر منوج سنہا نے جمعرات کو دیوبھومی اتراکھنڈ کے ہری دوار میں سوامی ستیہ مترانند گیری جی مہاراج کی مورتی نصب کرنے کی تقریب میں شرکت کی۔
روحانی، ثقافتی اور سَدگرو یادگاری تقریب سوامی اودھیشانند گیری جی مہاراج، آچاریہ مہامندلیشور جونا اکھاڑا کی رہنمائی میں منعقد ہوئی۔
اپنے خطاب میں لیفٹیننٹ گورنر نے ملک میں گہرے معاشی، ثقافتی اور روحانی احیا کا ذکر کرتے ہوئے کہا کہ اس سے معاشرے میں ایک نئی بیداری پیدا ہو رہی ہے۔
سنہا نے کہا’’مقدس سنتوں کی برکتوں سے لوگ جدید اور تبدیل شدہ بھارت کی تعمیر کے وژن کی طرف ثابت قدمی سے آگے بڑھ رہے ہیں‘‘۔
لیفٹیننٹ گورنر نے کہا کہ ہمارے آبا و اجداد کی ہزاروں سال پہلے کی اقدار آج دنیا بھر میں اپنائی جا رہی ہیں اور ممالک امن و ہم آہنگی کیلئے ’وسودھیو کٹمبکم‘ یعنی پوری دنیا ایک خاندان ہے کے فلسفے کو اپنا رہے ہیں۔
ایل جی نے کہا’’ازمنۂ قدیم سے ہماری روایت نے پوری انسانیت کی بھلائی کا پیغام دیا ہے۔ اس نے ہمیں دنیا کو ایک خاندان سمجھنے کا وسیع نظریہ دیا۔ہماری قدیم ثقافت نے کبھی تقسیم کو فروغ نہیں دیا بلکہ ہمیشہ اتحاد، انفرادی خوشی اور سب کی خوشحالی کی حمایت کی ہے۔ ہم نے روحانیت، عالمی فلاح اور حب الوطنی کو نئی تعریف دی ہے۔ دنیا کی قدیم ترین تہذیب و ثقافت کا گہوارہ بھارت دنیا میں دیرپا امن اور ہم آہنگی کی رہنمائی کرے گا‘‘۔
سنہا نے کہا کہ آج پوری دنیا بھارت کی سافٹ پاور اور روحانی ورثے کو تسلیم کرتی ہے جبکہ یوگا اور مراقبہ دنیا کے ہر خطے کے گھروں کی روزمرہ زندگی کا حصہ بن چکے ہیں۔
لیفٹیننٹ گورنر نے بتایا کہ رواں سال کے مرکزی بجٹ میں آثار قدیمہ مقامات کی ترقی، خانقاہ و مندروں کے تحفظ، بدھ سرکٹ کوریڈورز اور روحانی مقامات کی ڈیجیٹل آرکائیونگ کیلئے اہم اقدامات شامل ہیں، جس سے نوجوانوں میں ثقافتی فخر بڑھے گا اور اتحاد کو فروغ ملے گا۔
ایل جی نے کہا’’میرا یقین ہے کہ طویل جدوجہد کے بعد ہم ایسے تاریخی موڑ پر پہنچ چکے ہیں جہاں بھارت کو ایک بار پھر دنیا کی رہنمائی کرنی ہے۔ مجھے یقین ہے کہ اتحاد کی طاقت بھارت کو۲۰۴۷تک ایک ترقی یافتہ ملک بنائے گی اور ہم اپنی قدیم عظمت اور عالمی مقام دوبارہ حاصل کریں گے‘‘۔
تقریب میں بہار کے گورنر عارف محمد خان، اتراکھنڈ کے وزیر اعلیٰ پشکر سنگھ دھامی، مدھیہ پردیش کے وزیر اعلیٰ ڈاکٹر موہن یادو، سنتوں، روحانی رہنماؤں اور سوامی ستیہ مترانند گیری جی مہاراج کے عقیدت مندوں نے بھی شرکت کی۔