اگلے۳۶گھنٹوں کے دوران ہلکے برفباری‘بارشوںکا امکان

سرینگر: محکمہ موسمیات کی پیش گوئی کے مطابق وادی کشمیر میں اگلے۳۶گھنٹوں کے دوران موسمی صورتحال دگرگوں رہ سکتی ہے اور اس دوران ہلکی برف باری یا بارشوں کا امکان ہے۔
محکمہ نے ٹرانسپورٹروں اور مسافروں سے کہا ہے کہ وہ سڑکوں اور شاہراہوں کی تازہ صورتحال معلوم کرنے کے لئے متعلقہ ٹریفک یونٹوں کی طرف رجوع کریں اور انتظامیہ کی ایڈوائزری پر عمل کریں۔
متعلقہ محکمے کے ایک ترجمان نے بتایا کہ وادی میں۲فروری کو پہاڑی علاقوں میں کہیں کہیں ہلکی برف باری یا بارش ہوسکتی ہے۔
انہوں نے کہا کہ۳فروری کو موسم ابر آلود رہنے کے ساتھ کئی مقامات پر ہلکی برف باری یا بارش ہونے کا امکان ہے۔ان کا کہنا ہے کہ بعد میں۴سے۶فروری کی شام تک موسم جزوی ابر آلود مگر عام طور پر خشک رہ سکتا ہے۔
ترجمان نے بتایا کہ۷فروری کو موسم ایک بار پھر عام طور پر ابر آلود رہ سکتا ہے اور اس دوران پہاڑی علاقوں میں کہیں کہیں ہلکی برف باری یا بارش ہونے کا امکان ہے۔
ترجمان نے کہا کہ ۸فروری کو موسم عام طور پر خشک رہ سکتا ہے جبکہ۹سے۱۰فروری تک کہیں کہیں ہلکی برف باری یا بارشیں متوقع ہیں۔ان کا کہنا ہے کہ بعد میں۱۱؍اور۱۲فروری کو موسم ایک بار پھر موسم خشک رہ سکتا ہے۔
محکمے نے ٹرانسپورٹروں اور مسافروں سے کہا ہے کہ وہ سڑکوں اور شاہراہوں کی تازہ صورتحال معلوم کرنے کے لئے متعلقہ ٹریفک یونٹوں کی طرف رجوع کریں اور انتظامیہ کی ایڈوائزری پر عمل کریں۔ پہاڑی علاقوں کے لوگوں سے کہا گیا ہے کہ وہ ان علاقوں میں جانے سے گریز کریں، جہاں برفانی تودے رہنے کے خطرات رہتے ہیں۔