سی آر پی ایف کے ڈی جی کا مجموعی سکیورٹی صورتحال جائزہ 

سرینگر: سی آر پی ایف کےڈائریکٹر جنرل جی پی سنگھ نے سری نگر کے دو روزہ دورے کے دوران وادی کی مجموعی سیکورٹی صورتحال اور آپریشنل تیاریوں کا جائزہ لیا۔
اپنے دورے کے دوران انہوں نے متعدد اہم مقامات کا دورہ کیا، سیکورٹی اجلاسوں کی صدارت کی، جوانوں سے براہ راست گفتگو کی اور نئے قائم شدہ کمانڈ اینڈ کنٹرول سینٹر کی کارکردگی کا بھی معائنہ کیا۔
جمعرات کی دوپہر سری نگر ہوائی اڈے پہنچنے کے فوراً بعد ڈی جی سی آر پی ایف۵۴ویںبٹالین نشاط روانہ ہوئے، جہاں ان کے ہمراہ سپیشل ڈی جی آپریشنز راجیش کمار، آئی جی کشمیر سیکٹر اور آئی جی سری نگر سیکٹر موجود تھے۔ ڈی جی نے بٹالین کے معائنے کے ساتھ ایک اہم آپریشنل میٹنگ کی صدارت کی اور زمینی صورتحال کے بارے میں بریفنگ لی۔
بعد ازاں انہوں نے ہیڈکوارٹر سری نگر سیکٹر کا دورہ کیا جہاں ایک اعلیٰ سطحی سیکورٹی اجلاس منعقد ہوا۔ اس موقع پر ڈی جی نے نئے قائم شدہ کمانڈ اینڈ کنٹرول سینٹر کے کام کا تفصیلی جائزہ لیتے ہوئے ہائی ٹیک نگرانی، کوآرڈی نیشن سسٹمز اور ریئل ٹائم آپریشنل ریسپانس کی صلاحیتوں پر اطمینان کا اظہار کیا۔ انہوں نے اس امر کو بھی دوہرایا کہ سی آر پی ایف وادی میں کسی بھی ممکنہ سکیورٹی چیلنج سے نمٹنے کے لیے پوری طرح چوکس ہے۔
ڈی جی جی پی سنگھ نے کہا کہ فورس دہشت گردی کے کسی بھی خطرے کو بروقت ناکام بنانے اور امن برقرار رکھنے میں ہمیشہ اولین صف میں رہی ہے اور یہی عزم آئندہ بھی جاری رہے گا۔ انہوں نے اس بات پر زور دیا کہ عوامی تحفظ، آپریشنل ہم آہنگی اور جدید ٹیکنالوجی کے استعمال سے سیکورٹی گرڈ کو مزید مضبوط بنایا جا رہا ہے۔
اپنے دوسرے روز، یعنی۳۱جنوری کو ڈی جی نے گروپ سنٹر سری نگر کا دورہ کیا جہاں انہوں نے سینیئر کمانڈرز کے ساتھ سیکورٹی صورتحال اور فورس کی آپریشنل تیاریوں پر تفصیلی مشاورت کی۔ اجلاس میں موجودہ خطراتی رجحانات، انسدادِ دہشت گردی حکمت عملی، حساس علاقوں میں تعیناتی اور زمینی سطح کے چیلنجز پر بھی غور کیا گیا۔
اسی روز ڈی جی نے۴۴بٹالین کا بھی دورہ کیا جہاں انہوں نے جوانوں سے ’سینک سمیلن‘ میں براہ راست گفتگو کی، ان کے مسائل سنے، آپریشنل تجربات کے بارے میں معلومات حاصل کیں اور ان کے حوصلے بڑھائے۔ اپنے خطاب میں جی پی سنگھ نے سی آر پی ایف اہلکاروں کی بہادری، فرض شناسی اور مادر وطن کے لیے غیر متزلزل خدمت کو سراہتے ہوئے کہا کہ فورس کا ہر جوان قوم کے لیے فخر کا باعث ہے۔
ڈی جی نے یہ بھی یقین ظاہر کیا کہ سی آر پی ایف اپنے پیشہ ورانہ جذبے، آپریشنل مہارت اور عوام دوست روایات کے ساتھ ملک کی خدمت جاری رکھے گی اور امن کے قیام کے لیے ہر ممکن کوشش کرے گی۔
اس دو روزہ دورے کے دوران ڈی جی سی آر پی ایف نے وادی کی مجموعی سیکورٹی صورتحال پر اطمینان کا اظہار کرتے ہوئے واضح کیا کہ فورس اپنی تیاریوں، ٹیکنالوجی اور مشترکہ حکمت عملی کے ذریعے امن دشمن عناصر کے عزائم ناکام بنانے کے لیے پوری طرح تیار ہے۔