کشمیر میں فروری کا آغاز بھی برفباری سے ہو سکتا ہے 

سرینگر: محکمہ موسمیات کی پیش گوئی کے مطابق وادی کشمیر میں اگلے مہینے یعنی ماہ فروری کا آغاز برف و باراں ہونے سے امکان ہے۔
متعلقہ محکمے کے ایک ترجمان نے بتایا کہ وادی میں۳۱ جنوری اور یکم فروری کو کئی مقامات پر ہلکی سے درمیانی درجے کی برف باری یا بارشوں کا امکان ہے اور اس دوران کچھ مقامات پر تیز ہوائیں بھی چل سکتی ہیں۔
انہوں نے کہا کہ بعد میں۲فروری کی شام سے۳فروری کو دوپہر تک بھی کئی مقامات پر ہلکی برف باری یا بارشوں کا امکان ہے۔ان کا کہنا ہے کہ بعد میں۴سے۶ فروری تک موسم مجموعی طور پر خشک رہنے کا امکان ہے۔
ترجمان نے کہا کہ وادی میں۷فروری کچھ مقامات پر ہلکی برف باری یا بارشیں متوقع ہیں۔انہوں نے کہا کہ اس کے بعد وادی میں۸سے۱۰فروری تک موسم عام طور پر خشک رہنے کا امکان ہے۔محکمے نے اپنی ایڈوائزری میں ٹرانسپورٹروں اور مسافروں سے کہا ہے کہ وہ انتظامیہ اور ٹریفک حکام کے مشوروں کے مطابق اپنے سفر کا منصوبہ بنائیں۔
انہوں نے برف سے ڈھکے پہاڑی علاقوں کے لوگوں کو ہدایت دی ہے کہ وہ پھسلن والے علاقوں اور ان علاقوں جہاں برفانی تودے گر آنے کے خطرات رہتے ہیں، میں جانے سے گریز کریں۔
اس دوران خشک موسم کے بیچ بیشتر مقامات پر شبانہ درجہ حرارت نقطہ انجماد سے نیچے ریکارڈ ہونے کے نتیجے میں سخت سردیوں کا زور جاری ہے۔
کشمیر ویدر کے مطابق وسطی کشمیر میں واقع سیاحتی مقام سونہ مرگ سرد ترین علاقہ رہا ہے جہاں کم سے کم درجہ حرارت منفی10.6 ڈگری سینٹی گریڈ ریکارڈ ہوا ہے۔
سیاحتی مقامات گلمرگ اور پہلگام دوسرے اور تیسرے درجے پر رہے ہیں جہاں شبانہ درجہ حرارت بالترتیب منفی9.0 ڈگری سینٹی گریڈ اور منفی5.3 ڈگری سینٹی گریڈ ریکارڈ ہوا ہے۔گرمائی دارلحکومت سری نگر میں کم سے کم درجہ حرارت 1.3 ڈگری سینٹی گریڈ ریکارڈ ہوا ہے۔
شمالی ضلع کپوارہ میں شبانہ درجہ حرارت منفی3.1 ڈگری سینٹی گریڈ جبکہ گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت منفی0.3 ڈگری سینٹی گریڈ ریکارڈ ہوا ہے۔
جنوبی کشمیر کے اننت ناگ، پلوامہ، شوپیاں اور کولگام اضلاع میں شبانہ درجہ حرارت بالترتیب 0.3 ڈگری سینٹی گریڈ، 0.1 ڈگری سینٹی گریڈ،منفی2.6 ڈگری سینٹی گریڈ اور 1.1 ڈگری سینٹی گریڈ ریکارڈ ہوا ہے۔
شمالی کشمیر کے بارہمولہ اور بانڈی پورہ اضلاع میں شبانہ درجہ حرارت بالترتیب منفی1.4 ڈگری سینٹی گریڈ اور منفی0.5 ڈگری سینٹی گریڈ جبکہ وسطی کشمیر کے بڈگام اور گاندربل اضلاع میں کم سے کم درجہ حرارت بالترتیب 0.3 ڈگری سینٹی گریڈ اور منفی0.4 ڈگری سینٹی گریڈ ریکارڈ ہوا ہے۔
لداخ یونین ٹریٹری کے لیہہ اور کرگل اضلاع میں شبانہ درجہ حرارت بالترتیب منفی10.4 ڈگری سینٹی گریڈ اور منفی9.2 ڈگری سینٹی گریڈ ریکارڈ ہوا ہے۔
محکمہ موسمیات کی پیش گوئی کے مطابق وادی میں رواں ماہ کے اختتام تک موسم خشک رہنے کا امکان ہے۔