بیٹنگ ریٹریٹ کے ساتھ ہی۷۷ ویںیومِ جمہوریہ کی تقریبات کا اختتام 

جموں: روایتی بیٹنگ ریٹریٹ تقریب جمعرات کو ایم اے اسٹیڈیم میں منعقد ہوئی، جس کے ساتھ چار روزہ یومِ جمہوریہ کی تقریبات کا اختتام ہوا۔ اس موقع پر لیفٹیننٹ گورنر شری منوج سنہا نے بطور مہمانِ خصوصی شرکت کی۔
تقریب کے دوران قومی فخر اور حب الوطنی کا جذبہ نمایاں رہا، جب مسلح افواج اور جموں و کشمیر پولیس کے براس اور پائپ ڈرم بینڈز نے دل موہ لینے والی دھنوں پر مبنی محبِ وطن نغمات پیش کیے۔ سامعین “اے میرے وطن کے لوگو” اور دیگر کلاسیکی دھنوں کی پُرسوز پیشکش سے خوب محظوظ ہوئے۔
شاندار مظاہرے اور فنی مہارت کے اعتراف میں لیفٹیننٹ گورنر نے جموں و کشمیر پولیس اور سکیورٹی فورسز کے دستوں، پریڈ کمانڈر، سابق فوجیوں، پائپ اور براس بینڈز، مارچنگ دستوں (لڑکے اور لڑکیاں)، ڈیئر ڈیولز، مبصرین، ثقافتی فنکاروں اور بہترین ٹیبلوز کو انعامات سے نوازا۔
تقریب کے دوران محکمۂ اطلاعات و تعلقاتِ عامہ کے زیر اہتمام منعقدہ وندے ماترم گائیکی مقابلے اور یو ٹی سطح کے آن لائن مضمون نویسی مقابلے کے فاتحین کی بھی حوصلہ افزائی کی گئی۔
بیٹنگ ریٹریٹ تقریب کا اختتام مقبولِ عام ترانے ’سارے جہاں سے اچھا‘ کے ساتھ ہوا، جس کے ساتھ شاندار آتش بازی اور ساؤنڈ اینڈ لائٹ شو پیش کیا گیا، جبکہ آخر میں قومی ترانہ بجایا گیا۔