ایل جی کی بابا کاشی وشوناتھ سیوا سمیتی کی سلور جوبلی تقریبات میں شرکت

جموں: لیفٹیننٹ گورنر منوج سنہا نے جمعہ کے روز اتر پردیش کے وارانسی میں شری بابا کاشی وشوناتھ سیوا سمیتی کی سلور جوبلی کی یادگاری تقریب میں شرکت کی۔
اپنے خطاب میں لیفٹیننٹ گورنر نے شری بابا کاشی وشوناتھ سیوا سمیتی کی۲۵ سالہ خدماتی وراثت، لگن اور بے لوث خدمت کے جذبے کو سراہا۔
لیفٹیننٹ گورنر نے کہا’’سچی عقیدت بے لوث خدمت میں زندہ رہتی ہے، حقیقی بھکتی رحم دلی میں پنہاں ہوتی ہے‘‘۔
سنہا نے کہا کہ سالانہ شری امرناتھ جی یاترا کے دوران چندن واڑی بیس کیمپ پر یاتریوں کی خدمت انجام دینے والی یہ سمیتی عقیدے اور عمل کے درمیان ایک مضبوط پل بن چکی ہے اور بے لوث خدمت کے ذریعے سماج کے لیے ایک مثال قائم کر رہی ہے۔
لیفٹیننٹ گورنر نے کہا’’پچیس برسوں سے شری بابا کاشی وشوناتھ سیوا سمیتی اس اصول کی عملی تصویر بنی ہوئی ہے کہ سچا عقیدہ بے لوث خدمت کے ذریعے ظاہر ہوتا ہے‘‘۔
ایل جی نے مزید کہا’’آج کے دور میں روحانی شعور رحم، ہمدردی اور توازن فراہم کرتا ہے۔ روحانی خوشحالی قدروں سے وابستہ شہری پیدا کرتی ہے، جو ایک مضبوط سماج اور مستحکم قوم کی بنیاد بنتے ہیں‘‘۔
سنہا نے کہا کہ بلند پہاڑی علاقوں، سخت موسمی حالات اور جسمانی مشقت کے باوجود بابا برفانی کے عقیدت مندوں کی خدمت محض ایک تنظیمی سرگرمی نہیں بلکہ ایک روحانی ریاضت ہے۔
لیفٹیننٹ گورنر نے کہا’’چندن واڑی میں خدمات انجام دینے والے رضاکار رکاوٹیں ختم کر رہے ہیں اور انسانی ہمدردی پر مبنی رشتے قائم کر رہے ہیں۔ جب بھی کوئی رضاکار بغیر مانگے مدد کے لیے ہاتھ بڑھاتا ہے تو وہ ہمارے ملک کی روحانی بنیاد کو مزید مضبوط کرتا ہے‘‘۔
لیفٹیننٹ گورنر نے شری دلیپ سنگھ، صدر شری بابا کاشی وشوناتھ سیوا سمیتی، تمام عہدیداران اور رضاکاروں کو خدمت کو طرزِ زندگی بنانے پر مبارکباد دی۔
ایل جی نے کہا’’آئیے ہم سب عہد کریں کہ خدمت کو اپنی روزمرہ زندگی کا حصہ بنائیں، اپنے روحانی عقائد کو عملی شکل دیں اور باہمی تعاون، مہربانی اور پرامن بقائے باہمی پر مبنی ایک ایسے سماج کی تعمیر کے لیے مل کر کام کریں۔‘‘