ڈوڈہ حادثہ:وزیر اعظم مودی ‘صدر مرمو اور امیت شاہ کو گہرا صدمہ

سرینگر: وزیر اعظم نریندر مودی نے جمعرات کو کہا کہ وہ جموں و کشمیر کے ضلع ڈوڈہ میں سڑک حادثے میں فوجی اہلکاروں کی ہلاکت پر ’شدید رنجیدہ‘ ہیں۔
حکام کے مطابق انسدادِ دہشت گردی آپریشن کے لیے فوجیوں کو لے جانے والی فوج کی ایک بکتر بند گاڑی ڈوڈہ ضلع میں گہری کھائی میں جا گری، جس کے نتیجے میں۱۰فوجی جاں بحق اور۱۱ دیگر زخمی ہو گئے۔
وزیر اعظم نے سوشل میڈیا پلیٹ فارم ایکس پر ایک پوسٹ میں کہا،’’ڈوڈہ میں پیش آئے حادثے پر شدید صدمہ ہوا ہے، جس میں ہم نے اپنے بہادر فوجی اہلکار کھو دیے۔ قوم کے لیے ان کی خدمات کو ہمیشہ یاد رکھا جائے گا‘‘۔
مودی نے مزید کہا’’دعا ہے کہ زخمی جلد صحت یاب ہوں۔ متاثرین کو ہر ممکن مدد فراہم کی جا رہی ہے‘‘۔
یہ حادثہ دوپہر کے وقت بھدرواہ-چمبا بین الریاستی سڑک پر۹۰۰۰فٹ بلند خانی ٹاپ کے مقام پر اس وقت پیش آیا، جب بلٹ پروف گاڑی کا ڈرائیور گاڑی پر قابو کھو بیٹھا اور گاڑی تقریباً۲۰۰فٹ گہری کھائی میں جا گری۔
ادھر صدر جمہوریہ دروپدی مرمو نے بھی اس سڑک حادثے پر گہرے رنج و غم کا اظہار کیا۔صدر جمہوریہ نے ایکس پر کہا’’جموں و کشمیر کے ڈوڈہ میں سڑک حادثے میں بھارتی فوجی اہلکاروں کی ہلاکت کی خبر نہایت افسوسناک ہے۔ میں غمزدہ خاندانوں سے دلی تعزیت کا اظہار کرتی ہوں اور زخمی فوجیوں کی جلد صحت یابی کے لیے دعا گو ہوں‘‘۔
مرکزی وزیر داخلہ امت شاہ نے بھی اس حادثے پر گہرے دکھ کا اظہار کیا۔انہوں نے ہندی میں ایکس پر جاری بیان میں کہا کہ وہ اس واقعے سے ’انتہائی دکھی‘ہیں اور جاں بحق فوجیوں کے اہل خانہ سے دلی تعزیت کا اظہار کرتے ہیں۔
امت شاہ نے کہا’’ڈوڈہ، جموں و کشمیر میں پیش آئے سڑک حادثے سے مجھے گہرا دکھ پہنچا ہے۔ اس المناک واقعے میں جان گنوانے والے ہمارے بہادر فوجیوں کے اہل خانہ سے میری دلی تعزیت ہے‘‘۔
وزیر داخلہ نے بتایا کہ زخمی فوجی اہلکاروں کو اعلیٰ ترین سطح کی طبی سہولیات فراہم کی جا رہی ہیں۔انہوں نے کہا’’زخمی جوانوں کو بہترین ممکنہ طبی امداد دی جا رہی ہے۔ میں خدا سے دعا کرتا ہوں کہ تمام فوجی جلد از جلد صحت یاب ہوں۔‘‘