اُدھم پور میں وی پی این کا استعمال خاتون کے خلاف مقدمہ درج

جموں: جموں و کشمیر کے ضلع اُدھم پور میں سکیورٹی وجوہات کی بنا پر موبائل فونز پر ورچوئل پرائیویٹ نیٹ ورک (وی پی این) سروسز کے استعمال پر عائد پابندی کی مبینہ خلاف ورزی پر ایک خاتون کے خلاف مقدمہ درج کیا گیا ہے۔
پولیس نے ہفتہ کے روز یہ جانکاری دی۔
پولیس ترجمان کے مطابق مینا شرما زوجہ موہن لال کے خلاف مجلتا پولیس اسٹیشن میں بھارتیہ نیائے سنہتا (بی این ایس) کی متعلقہ دفعات کے تحت مقدمہ درج کیا گیا ہے۔
الزام ہے کہ انہوں نے ضلع مجسٹریٹ کے اُس حکم کی خلاف ورزی کی، جو۳جنوری کو جاری کیا گیا تھا اور جس میں ضلع بھر میں وی پی این سروسز کے استعمال پر پابندی عائد کی گئی تھی۔
ترجمان نے بتایا کہ مینا شرما مجلتا کے پالنو گاؤں کی رہائشی ہیں اور ان کے موبائل فون نمبر پر وی پی این سروس کے استعمال کا انکشاف ہوا ہے۔
پولیس کے مطابق معاملے کی مزید تفتیش جاری ہے۔ ترجمان نے عوام سے اپیل کی ہے کہ وہ موبائل فونز پر وی پی این اور دیگر ممنوعہ ایپس کے استعمال سے گریز کریں۔