برف باری کے بعد سرینگر،لہہ شاہراہ پر ٹریفک بحال

گاندربل: زونجیلا پاس کے محور پر واقع سرینگر،لہہ قومی شاہراہ پر حالیہ برف باری کے باعث دو روزہ بندش کے بعد ہفتہ کے روز ٹریفک کی آمد و رفت بحال کر دی گئی۔
بارڈر روڈز آرگنائزیشن (بی آر او) نے موسم میں بہتری کے بعد ہفتہ کی صبح زونجیلا پاس پر برف ہٹانے کا کام شروع کیا تھا، جہاں تازہ برف باری ہوئی تھی۔
ایک عہدیدار نے بتایا کہ زونجیلا پاس پر برف صاف کرنے کے لیے مشینری لگائی گئی، جہاں جمعہ کے روز تقریباً۸سے۱۰؍انچ تک برف پڑی تھی۔ احتیاطی تدبیر کے طور پر شاہراہ کو بند کیا گیا تھا، تاہم موسم بہتر ہوتے ہی ہفتہ کی علی الصبح برف ہٹانے کا عمل شروع کیا گیا۔
عہدیدار کے مطابق سڑک کی صفائی مکمل ہونے کے بعد کرگل کی جانب سے سرینگر،لہہ شاہراہ پر ٹریفک کی آمد و رفت بحال کر دی گئی۔ حکام نے ڈرائیوروں سے اپیل کی ہے کہ وہ اس شاہراہ پر سفر کے دوران احتیاطی تدابیر اختیار کریں۔
ادھر ٹریفک پولیس کی ایڈوائزری کے مطابق، بی آر او کی جانب سے گرین سگنل ملنے کے بعد سونمرگ کی جانب سے کارگل کی طرف ٹریفک کو اتوار کے روز اجازت دی جائے گی۔