بڈگام میں۴کلو سے زیادہ  رس جیسا مواد بر آمد‘۳گرفتار

سرینگر: جموںکشمیر پولیس نے وسطی ضلع بڈگام میں الگ الگ کارروائیوں کے دوران تین منشیات فروشوں کو گرفتار کرکے ان کے قبضے سے۴کلو سے زیادہ چرس جیسا ممنوعہ مواد بر آمد کیا ہے ۔
ایک پولیس ترجمان نے بتایا کہ پولیس اسٹیشن ماگام کی ایک ٹیم نے بٹہ پورہ کراسنگ پر ناکے کے دوران ایک مشتبہ شخص کو دھر لیا جس نے ایک نائلون بیگ اٹھا رکھا تھا۔
ترجمان نے کہا کہ تلاشی کے دوران اس کے قبضے سے۲کلو۱۰۰گرام پسا ہوا چرس جیسا مواد بر آمد کیا گیا جس کے بعد اس کو بر سر موقع ہی گرفتار کیا گیا۔
ملزم کی شناخت روف احمد حجام ولد محمد رمضان حجام ساکن بٹہ پورہ کانہامہ کے طور پر ہوئی ہے ۔
ان کا کہنا ہے کہ اس ضمن میں پولیس اسٹیشن ماگام میں این ڈی پی ایس ایکٹ کے متعلقہ دفعات کے تحت زیر ایف آئی آر نمبر۵/۲۰۲۶ایک مقدمہ درج کیا گیا اور مزید تحقیقات شروع کی گئی۔
پولیس ترجمان نے بتایا کہ اسی طرح کی ایک اور کارروائی کے دوران پولیس پوسٹ ہرد پنزو کی ایک ٹیم نے بونہ زانی گام علاقے میں ناکے کے دوران نائیلون بیگ اٹھائے دو مشتبہ افراد کو دھر لیا جنہوں نے پولیس کو دیکھ کر فرار ہونے کی کوشش کی تاہم انہیں موقع پر ہی دھر لیا گیا۔
ترجمان نے کہا کہ تلاشی کے دوران ان کی تحویل سے۲کلو۱۸۵پسا ہوا چرس جیسا ممنوعہ مواد بر آمد کیا گیا جس کے بعد دونوں کو موقع پر ہی گرفتار کیا گیا۔ملزموں کی شناخت عرفان احمد میر ولد محمد یوسف میر اور اویس احمد بٹ ولد غلام محمد بٹ ساکنان ہر دل اتنہ کے طور پر ہوئی ہے ۔
ان کا کہنا ہے کہ اس سلسلے میں پولیس اسٹیشن بیروہ میں این ڈی پی ایس ایکٹ کے متعلقہ دفعات کے تحت زیر ایف آئی آر نمبر۱۱/۲۰۲۶ایک مقدمہ درج کیا گیا اور مزید تحقیقات شروع کی گئی۔