بی جے پی اور سنگھرش سمیتی کا ویشنو دیوی میڈیکل کالج سے متعلق این ایم سی کے فیصلے کا خیرمقدم

سرینگر: شری ماتا ویشنو دیوی انسٹی ٹیوٹ آف میڈیکل ایکسی لینس کو کم از کم معیارات پر پورا نہ اترنے کی بنیاد پر اجازت نامہ واپس لینے کے نیشنل میڈیکل کمیشن(این ایم سی )کے فیصلے پر یہاں ملے جلے ردِ عمل سامنے آئے ہیں۔
بدھ کے روز بی جے پی اور سنگھرش سمیتی نے اس فیصلے کا خیرمقدم کیا، جبکہ نیشنل کانفرنس (این سی) اور پیپلز ڈیموکریٹک پارٹی (پی ڈی پی) نے اسے خطے کے لیے ایک بڑا دھچکا قرار دیا۔
سنگھرش سمیتی، جو بی جے پی کی حمایت یافتہ دائیں بازو کی تنظیموں کا ایک نیا اتحاد ہے، گزشتہ برس نومبر سے جموں میں احتجاج کی قیادت کر رہی تھی۔ اس احتجاج میں میڈیکل کالج میں داخلوں کی منسوخی اور شری ماتا ویشنو دیوی پر ایمان رکھنے والے طلبہ کے لیے خصوصی طور پر نشستیں محفوظ کرنے کا مطالبہ کیا جا رہا تھا۔
یہ سمیتی اُس وقت سامنے آئی جب۵۰ طلبہ پر مشتمل ایم بی بی ایس کے پہلے بیچ میں داخلے نیٹ میرٹ لسٹ کے ذریعے مکمل ہوئے۔ ان میں۴۲طلبہ مسلمان تھے—جن میں اکثریت کا تعلق کشمیر سے تھا—جبکہ جموں سے سات ہندو طلبہ اور ایک سکھ امیدوار شامل تھا۔ اس تناسب نے داخلوں کی منسوخی اور تمام نشستیں ہندو طلبہ کے لیے مخصوص کرنے کے مطالبات کو جنم دیا۔
نیشنل میڈیکل کمیشن کے میڈیکل اسیسمنٹ اینڈ ریٹنگ بورڈ(ایم اے آر ڈبی)نے منگل کے روز جموں و کشمیر کے ضلع ریاسی میں واقع اس ادارے کو دی گئی لیٹر آف پرمیشن کو کم از کم معیارات پر عدم تعمیل کی بنیاد پر واپس لے لیا۔
ایم اے آر بی کی جانب سے جاری کردہ حکم نامے میں کہا گیا ہے کہ تعلیمی سال۲۰۲۵۔۲۶کے دوران کاؤنسلنگ کے ذریعے کالج میں داخل کیے گئے تمام طلبہ کو یونین ٹیریٹری انتظامیہ کی مجاز اتھارٹی کے ذریعے جموں و کشمیر کے دیگر میڈیکل اداروں میں سپر نیومری نشستوں پر ایڈجسٹ کیا جائے گا۔
جموں و کشمیر بی جے پی کے صدر ست شرما نے یہاں نامہ نگاروں سے بات کرتے ہوئے کہا،’’ہم نیشنل میڈیکل کمیشن کے میڈیکل اسیسمنٹ اینڈ ریٹنگ بورڈ، مرکزی وزیر صحت جے پی نڈا اور لیفٹیننٹ گورنر منوج سنہا کے اس فیصلے کا خیرمقدم کرتے ہیں کہ اجازت نامہ واپس لیا گیا، تاہم ساتھ ہی طلبہ کے مستقبل کو بھی محفوظ بنایا گیا۔‘‘
شرما نے کہا کہ اگرچہ اجازت نامہ کم از کم معیارات پر پورا نہ اترنے کی بنیاد پر واپس لیا گیا، لیکن گزشتہ کئی دنوں سے مختلف سماجی و سیاسی تنظیموں سے وابستہ لوگ سڑکوں پر تھے اور داخلوں کی منسوخی کا مطالبہ کر رہے تھے، کیونکہ یہ ادارہ ہندوؤں کے عطیات سے چلایا جا رہا ہے۔
بی جے پہ لیڈر نے کہا’’میں اس کامیابی کا سہرا ماتا ویشنو دیوی کے سر باندھتا ہوں کیونکہ یہ عقیدے کا معاملہ تھا۔ اگر یہ کسی اور میڈیکل کالج کا معاملہ ہوتا تو ہم اسے سیاسی رنگ نہ دیتے۔ این ایم سی نے شکایات پر کارروائی کی اور نڈا نے اس بات کو یقینی بنایا کہ داخل شدہ طلبہ کا مستقبل محفوظ رہے، جو قابلِ تعریف ہے۔‘‘
جب ان سے وزیر اعلیٰ عمر عبداللہ کے اس بیان کے بارے میں پوچھا گیا، جس میں انہوں نے سمیتی کے مطالبات پر ناراضگی ظاہر کرتے ہوئے کہا تھا کہ طلبہ کو میرٹ کی بنیاد پر داخلہ ملا ہے، تو ست شرما نے کہا کہ اس معاملے پر کوئی بھی ان کی حکومت کو موردِ الزام نہیں ٹھہرا رہا۔
انہوں نے کہا’’عبداللہ میڈیا میں رہنے کے لیے اس طرح کے بیانات دینے کے عادی ہیں۔ ان کی حکومت عوام کو بجلی اور پینے کا پانی تک فراہم کرنے میں ناکام رہی ہے۔ ان کی حکومت کے معیار مسلسل گر رہے ہیں، جس کا ثبوت بڈگام اور ناگروٹہ کے اسمبلی ضمنی انتخابات کے نتائج ہیں، جہاں نیشنل کانفرنس دونوں نشستیں ہار گئی۔‘‘انہوں نے وزیر اعلیٰ سے اپیل کی کہ وہ بنیادی سہولیات کی فراہمی کو یقینی بنانے پر توجہ دیں۔
سنگھرش سمیتی نے این ایم سی کے فیصلے کا جشن مناتے ہوئے ڈھول بجائے اور مٹھائیاں تقسیم کیں۔
سمیتی کے کنوینر، کرنل (ریٹائرڈ) سکھویر سنگھ منکوٹیا نے نامہ نگاروں سے بات کرتے ہوئے کہا’’ہم اپنی۴۵ روزہ طویل اور کامیاب تحریک ختم کر رہے ہیں، لیکن ہم  بورڈ کی سرگرمیوں پر نظر رکھیں گے۔ شریں بورڈ کو صرف ہندوؤں کی فلاح کے لیے کام کرنا چاہیے اور سرکاری امور میں مداخلت نہیں کرنی چاہیے۔‘‘
نیشنل کانفرنس کے میڈیا انچارج (پیر پنجال) وویک شرما نے کہا کہ ماتا ویشنو دیوی میڈیکل کالج کی بندش جموں کے لیے ایک سنگین دھچکا ہے۔
شرما نے سوشل میڈیا پوسٹ میں کہا،’’جو کچھ ہوا وہ ایک غلط نیت پر مبنی تحریک تھی‘ جسے تفریق پر مبنی سیاست نے جنم دیا، جہاں بعض عناصر نے ایک جھوٹے بیانیے کے تحت مسلم طلبہ کو نشانہ بنانے اور نکالنے کی کوشش کی۔ افسوسناک بات یہ ہے کہ اس لاپرواہ سیاست نے ہندو طلبہ کو بھی نقصان پہنچایا۔‘‘انہوں نے کہا کہ اگرچہ طلبہ دیگر اداروں میں تعلیم حاصل کر سکتے ہیں، مگر اصل اور ناقابلِ تلافی نقصان مقامی سطح پر ہوا ہے۔
ان کا کہنا تھا،’’اس میڈیکل کالج سے جڑی سینکڑوں تدریسی اور غیر تدریسی نوکریاں عملاً ختم ہو گئی ہیں، جو جموں کے خاندانوں، روزگار اور علاقائی معیشت کے لیے براہِ راست ضرب ہے۔‘‘
نیشنل کانفرنس کے رہنما نے ’’نفرت کی سیاست‘‘ کی مذمت کرتے ہوئے کہا کہ اداروں کو مکالمے، ضابطہ جاتی تعمیل اور اصلاحات کے ذریعے مضبوط کیا جانا چاہیے، نہ کہ فرقہ وارانہ ایجنڈوں کی بھینٹ چڑھایا جانا چاہیے۔
انہوں نے کہا،’’بی جے پی اور اس کے اتحادیوں کو جواب دینا ہوگا کہ ان کے تفریقی رویے کی وجہ سے جموں اپنا ادارہ، اپنی نوکریاں اور اپنا مستقبل کیوں کھو بیٹھا۔ جموں ایک فعال میڈیکل کالج کا حقدار تھا، نہ کہ عدم برداشت سے جنم لینے والی بندش کا۔‘‘
پی ڈی پی کے ترجمان آدتیہ گپتا نے دعویٰ کیا کہ کالج کی بندش کے ذمہ دار بی جے پی اور نیشنل کانفرنس دونوں ہیں۔
گپتا نے کہا’’شری ماتا ویشنو دیوی میڈیکل کالج بی جے پی اور نیشنل کانفرنس کی ملی بھگت سے بند ہوا ہے۔ یہ جموں کے لیے ایک بڑا دھچکا ہے اور خطے کے عوام کے ساتھ بی جے پی کی جانب سے غداری کی عکاسی کرتا ہے۔‘‘