پاکستان میں مقیم دہشت گرد ہینڈلر کی جائیداد ضبط

جموں: جموں و کشمیر پولیس نے سرحد پار سرگرم دہشت گرد نیٹ ورک کے خلاف ایک اہم آپریشن میں پاکستان میں مقیم ایک دہشت گرد ہینڈلر اور لانچ کمانڈر کی جائیداد کو یو اے پی اے کے تحت ضبط کر لیا ہے ۔
پولیس کے مطابق ضبطی کی یہ کارروائی ایف آئی آر نمبر۱۹۴/ ۲۰۲۴کے سلسلے میں عمل میں لائی گئی، جو پولیس اسٹیشن گرسائی میں درج ہے ۔ ضبط کی گئی ملکیت میں ۴رلے اور ۲رسائی پر مشتمل زرعی رقبہ شامل ہے ، جو تحصیل مینڈھر کے نر، نکہ مجھاری علاقے میں واقع ہے ۔
یہ جائیداد رفیق نائی عرف سلطان ولد محمد افضل کی ہے ، جو اس وقت پاکستان میں مقیم ہے اور کالعدم تنظیم تحریک المجاہدین/جموں کشمیر غزنوی فورس کا سرگرم لانچ کمانڈر و ہینڈلر ہے ۔ پولیس بیان کے مطابق رفیق نائی منشیات و اسلحے کی اسمگلنگ، تربیت یافتہ دہشت گردوں کی دراندازی میں مدد، اور پونچھ۔ راجوری بیلٹ میں دہشت گرد سرگرمیوں کی بحالی میں براہِ راست ملوث ہے ۔
رفیق نائی کو نامزد انفرادی دہشت گرد قرار دیا گیا ہے اور وہ قتل، اقدام قتل، سازش، اسلحہ ایکٹ، اور یو اے پی اے کی متعدد دفعات کے تحت کئی سنگین مقدمات میں مطلوب ہے ۔ ان میں۲۰۰۳،۲۰۰۴،۲۰۰۶۔۲۰۲۰،۲۰۲۱،۲۰۲۲؍۲۰۲۴ کے متعدد مقدمات شامل ہیں جن میں دہشت گردی اور اسلحہ اسمگلنگ کے سنگین الزامات درج ہیں۔
پولیس اور محکمہ مال کی مشترکہ ٹیم نے تمام قانونی تقاضے پورے کرتے ہوئے ضبطی کی کارروائی انجام دی، جس میں موقع پر جانچ، دستاویزات کی تکمیل اور مجاز اتھارٹی کی منظوری شامل تھی۔
پولیس کا کہنا ہے کہ یہ قدم دہشت گرد نیٹ ورک کی مالی کمر توڑنے کی وسیع تر حکمت عملی کا حصہ ہے ، تاکہ کسی بھی ایسے فرد یا گروہ کو وسائل فراہم نہ ہو سکیں جو ملک دشمن سرگرمیوں میں ملوث ہوں۔