لیفٹیننٹ گورنر اوروزیر اعلیٰ کی لوگوں کو نئے سال کی مبارکباد 

سرینگر: لیفٹیننٹ گورنر منوج سنہا، وزیر اعلیٰ عمر عبداللہ، نائب وزیر اعلیٰ سریندر چودھری اور وزیر سکینہ اِیتو نے آج نئے سال کے موقع پر جموں و کشمیر کے عوام کو مبارکباد پیش کی۔
اپنے پیغام میں لیفٹیننٹ گورنر نے کہا’’نئے سال کے موقع پر میں تمام شہریوں کو دلی مبارکباد اور نیک خواہشات پیش کرتا ہوں۔ نئے سال کی خوشیاں ہماری زندگی میں نئی امیدیں اور نئے مواقع لے کر آتی ہیں۔آئیے ہم سب ایک خوشحال اور صحت مند معاشرے کی تعمیر کے لیے خود کو وقف کریں اور جموں و کشمیر کو ترقی اور خوشحالی کی نئی بلندیوں تک لے جائیں‘‘۔
ایل جی کا پیغام میں کہنا تھا’’ ہم بھارت کی فلاح و بہبود اور ترقی کو یقینی بنانے کے لیے بھی خود کو وقف کریں اور مستقبل کے چیلنجز کا سامنا کرنے کا عہد کریں تاکہ اپنے خوابوں کو حقیقت میں بدل سکیں، اپنی بنیادی اقدار کو محفوظ رکھیں، انہیں زندگی کے اہداف سے ہم آہنگ کریں اور اپنی امنگوں کو عملی شکل دیں۔دعا ہے کہ یہ نیا سال سب کے لیے خوشی اور خوشحالی لے کر آئے‘‘۔
وزیر اعلیٰ عمر عبداللہ نے بھی جموں و کشمیر کے عوام کو نئے سال کی دلی مبارکباد دی اور آنے والے سال کے لیے امن، خوشحالی اور صحتِ کاملہ کی دعا کی۔
اپنے پیغام میں وزیر اعلیٰ نے امید ظاہر کی کہ نیا سال جموں و کشمیر میں نئی اُمیدوں، ہم آہنگی اور ترقی کے مواقع لے کر آئے گا۔انہوں نے کہا کہ یہ موقع مشترکہ امنگوں پر غور کرنے اور ایک زیادہ ہمہ گیر، مضبوط اور خوشحال جموں و کشمیر کی تعمیر کے لیے اجتماعی عزم کی تجدید کا ہے۔
وزیر اعلیٰ نے کہا’’دعا ہے کہ نیا سال ہر گھر میں خوشیاں لے کر آئے اور ہمیں مجموعی سماجی ترقی اور فلاح و بہبود کے لیے باہمی احترام اور لگن کے ساتھ مل کر کام کرنے کی ترغیب دے‘‘۔
عمرعبداللہ نے معاشرے کے تمام طبقات، بالخصوص نوجوانوں سے اپیل کی کہ وہ امن، اتحاد اور پائیدار ترقی کے لیے مثبت کردار ادا کریں اور خطے کے روشن مستقبل کی تشکیل میں سرگرم حصہ لیں۔
وزیر اعلیٰ نے ایسے سال کے لیے دعا کی جو استحکام، معاشی ترقی اور عوام کے درمیان بھائی چارے کے مضبوط رشتوں سے عبارت ہو۔
نائب وزیر اعلیٰ سریندر چودھری نے بھی نئے سال۲۰۲۶کے موقع پر جموں و کشمیر کے عوام کو دلی مبارکباد پیش کی اور ان کے لیے امن، خوشحالی اور مسرت کی خواہش کا اظہار کیا۔
نائب وزیر اعلیٰ نے کہا کہ حکومت ترقیاتی ایجنڈے کو نئی توانائی کے ساتھ آگے بڑھانے کے لیے پُرعزم ہے، تاکہ ترقی اور پیش رفت کے ثمرات معاشرے کے ہر طبقے تک پہنچ سکیں۔انہوں نے اس بات پر زور دیا کہ حکومت کی توجہ بدستور معیارِ زندگی کو بہتر بنانے، بنیادی ڈھانچے کو مضبوط کرنے اور عوام دوست خدمات کو مؤثر اور شفاف انداز میں فراہم کرنے پر مرکوز رہے گی۔
چودھری نے کہا کہ مساوی مواقع، ہمہ گیر ترقی اور سماجی انصاف کی فراہمی کا عزم نہ صرف۲۰۲۶ بلکہ آنے والے برسوں میں بھی حکومتی پالیسیوں کی رہنمائی کرتا رہے گا۔ انہوں نے مزید کہا کہ نوجوانوں کو بااختیار بنانے، روزگار کے مواقع پیدا کرنے، انفراسٹرکچر کی ترقی اور پسماندہ طبقات کی فلاح و بہبود کے لیے خصوصی اقدامات کیے جائیں گے۔
جموں و کشمیر کے سماجی تنوع کو اجاگر کرتے ہوئے انہوں نے کہا کہ یہ خطہ ہمیشہ سے سیکولرازم، ہم آہنگی اور باہمی بقائے باہمی کی روشن مثال رہا ہے۔اس موقع پر نائب وزیر اعلیٰ نے عوام سے اپیل کی کہ وہ تمام شعبوں کی بحالی، امن کے استحکام اور ایک پُرامن، ترقی یافتہ اور خوشحال جموں و کشمیر کی تعمیر کے لیے انتظامیہ کو بھرپور تعاون فراہم کریں۔
وزیر برائے صحت و طبی تعلیم، سماجی بہبود اور تعلیم، سکینہ اِیتو نے بھی نئے سال۲۰۲۶کے موقع پر جموں و کشمیر کے عوام کو دلی مبارکباد پیش کی اور امید ظاہر کی کہ آنے والا سال معاشرے کے تمام طبقات کے لیے خوشحالی اور بہتر فلاح و بہبود لے کر آئے گا۔
اپنے پیغام میں وزیر موصوفہ نے کہا کہ نیا سال نئی اُمیدوں اور ایک صحت مند اور زیادہ ہمہ گیر مستقبل کے لیے اجتماعی عزم کی تجدید کا موقع فراہم کرتا ہے۔ انہوں نے چیلنجز سے نمٹنے اور ایک مضبوط صحت نظام کی تعمیر کے لیے اتحاد، ہمدردی اور مشترکہ ذمہ داری کی اہمیت پر زور دیا۔
سکینہ اِیتو نے عوام دوست اور جوابدہ طرزِ حکمرانی کے لیے حکومت کے مسلسل عزم کو اجاگر کرتے ہوئے کہا کہ جموں و کشمیر کے طول و عرض میں ترقیاتی منظرنامے کو مضبوط اور بہتر بنانے پر خصوصی توجہ دی جا رہی ہے۔ انہوں نے اعتماد ظاہر کیا کہ مسلسل کوششوں اور عوامی تعاون سے آنے والے سال میں ہر شعبے میں بامعنی پیش رفت ممکن ہو گی۔
وزیر موصوفہ نے جموں و کشمیر کے پورے خطے کے لیے امن، ترقی اور خوشحالی کی دعا بھی کی۔