سنتوش ٹرافی کیلئے ٹیم کے انتخاب کی تحقیقات کیلئے کمیٹی قائم

حکومتِ جموں و کشمیر نے سنتوش ٹرافی ۲۰۲۵ کیلئے۷۹ویں قومی فٹبال چیمپئن شپ میں شرکت کرنے والی جموں و کشمیر فٹبال ٹیم کے انتخابی عمل کا جائزہ لینے کیلئے ایک اعلیٰ سطحی جانچ کمیٹی تشکیل دے دی ہے۔
بدھ کو جاری ہو نے والے ایک حکومتی حکم نامے کے مطابق کمیٹی کو ہدایت دی گئی ہے کہ وہ ٹیم کے انتخاب کے پورے عمل کا تفصیلی جائزہ لے کر مقررہ مدت کے اندر حقائق پر مبنی رپورٹ پیش کرے۔
یہ کمیٹی ڈائریکٹر جنرل یوتھ سروسز اینڈ اسپورٹس جموں و کشمیر، محترمہ انورادا گپتا (جے کے اے ایس) کی سربراہی میں کام کرے گی، جس میں مختلف محکموں کے سینئر افسران کے ساتھ ساتھ تجربہ کار کھیلوں کے ماہرین بھی شامل ہوں گے۔
ڈائریکٹر جنرل کو یہ اختیار بھی دیا گیا ہے کہ وہ کمیٹی میں دو سابق قومی سطح کے فٹبال کھلاڑی شامل کریں، جن میں ایک کشمیر اور ایک جموں خطے سے ہوگا۔
کمیٹی کو ہدایت دی گئی ہے کہ وہ گہرائی کے ساتھ جانچ کرے اور اپنی سفارشات پر مشتمل رپورٹ سات دن کے اندر حکومت کو پیش کرے۔
حکومت نے اس عمل میں عوامی شمولیت کو بھی یقینی بنانے کا فیصلہ کیا ہے۔ اس مقصد کے تحت عام شہریوں کو جموں اور سری نگر میں مقرر کردہ تین تین دنوں کے دوران اپنے مشورے، اعتراضات اور آراء پیش کرنے کی اجازت دی جائے گی۔