دہلی پولیس نے میسی کے پروگرام کے حوالے سے ایڈوائزری جاری کی

نئی دہلی، 15 دسمبر (یو این آئی) دہلی ٹریفک پولیس نے پیر کے روز عالمی شہرت یافتہ فٹبالر لیونل میسی کے دورے کے پیشِ نظر ٹریفک کے حوالے سے ایڈوائزری جاری کی ہے ۔
میسی کا پروگرام دوپہر ایک بجے سے شام 4 بجے تک دارالحکومت کے ارون جیٹلی اسٹیڈیم، فیروز شاہ کوٹلہ گراؤنڈ میں ہے ۔ اس حوالے سے ٹریفک پولیس نے کہا کہ پروگرام کے دوران گاڑیوں کے راستوں میں تبدیلی، بندش اور بڑی تعداد میں ناظرین کی آمد و رفت کی وجہ سے اسٹیڈیم کے اندر اور ارد گرد ٹریفک کی رفتار سست رہنے کی توقع ہے ۔ بہادر شاہ ظفر روڈ اور جواہر لعل نہرو روڈ پر ٹریفک بندشیں رہیں گی، جبکہ دریا گنج سے بہادر شاہ ظفر روڈ اور گرو نانک چوک سے آصف علی روڈ تک بھاری گاڑیوں کی آمد و رفت پر پابندی لگا دی گئی ہے ۔
پولیس نے مسافروں کو مشورہ دیا ہے کہ دوپہر 12 بجے سے شام 5 بجے کے درمیان کئی مرکزی راستوں سے گریز کریں، جن میں راج گھاٹ سے دہلی گیٹ تک جواہر لعل نہرو روڈ، کملا مارکیٹ تک، ترکمان گیٹ سے دہلی گیٹ تک آصف علی روڈ، اور دہلی گیٹ سے رام چندر اگروال چوک (آئی ٹی او) تک، بہادر شاہ ظفر روڈ دونوں جانب شامل ہیں۔
اسٹیڈیم میں گیٹ ایک سے آٹھ تک جنوب کی جانب بہادر شاہ ظفر روڈ سے ، گیٹ 10 سے 15 تک، مشرق کی جانب امبیڈکر اسٹیڈیم بس ٹرمینل کے قریب جے ایل این روڈ سے ، اور گیٹ 16 سے 18 تک مغرب کی جانب پیٹرول پمپ کے قریب بہادر شاہ ظفر روڈ سے داخل ہوسکتے ہیں۔ ماتا سندری روڈ، راج گھاٹ پاور ہاؤس روڈ اور ویلڈرم روڈ پر مفت پارکنگ کی سہولت دی گئی ہے ۔ اسٹیڈیم کے قریب پارکنگ صرف لیبل والی گاڑیوں کے لیے ہوگی، اور مقررہ پارکنگ ایریا میں داخلہ شہیدی پارک کے قریب بہادر شاہ ظفر روڈ پر وکرم نگر کٹ سے ہوگا۔
ایڈوائزری میں کہا گیا ہے کہ بہادر شاہ ظفر روڈ، جے ایل این روڈ اور راج گھاٹ اور اندراپرسھ (آئی پی) پل کے درمیان رنگ روڈ پر پارکنگ کی اجازت نہیں ہوگی۔ غلط طریقے سے پارک کی گئی گاڑیوں کو اٹھا لیا جائے گا اور ان کے خلاف کارروائی کی جائے گی۔ ایپ پر مبنی ٹیکسی پک اپ اور ڈراپ آف پوائنٹس مولانا آزاد میڈیکل کالج گیٹ نمبر 2 پر بہادر شاہ ظفر روڈ اور راج گھاٹ چوک پر قائم کیے گئے ہیں۔
دہلی ٹریفک پولیس نے مسافروں سے اپیل کی ہے کہ وہ اپنے سفر کی پہلے سے منصوبہ بندی کریں اور اپنے سرکاری مواصلاتی چینلز کے ذریعے معلومات حاصل کرتے رہیں۔