جموں صوبے کے سمر زون اسکولوں میں مرحلہ وار سرمائی تعطیلات کا اعلان

ڈائریکٹوریٹ آف اسکول ایجوکیشن جموںنے ہفتہ کے روز جاری ایک سرکاری حکم نامے کے ذریعے جموں ڈویڑن کے سمر زون علاقوں میں واقع تمام سرکاری اور تسلیم شدہ نجی اسکولوں کے لیے سرمائی تعطیلات کا مرحلہ وار اعلان کر دیا ہے۔
حکم نامے کے مطابق پری پرائمری سے پانچویں جماعت تک کے طلبہ کے لیے سرمائی تعطیلات ۲۲ دسمبر ۲۰۲۵ سے۱۰ جنوری ۲۰۲۶ تک ہوں گی۔
چھٹی سے آٹھویں جماعت کے طلبہ کے لیے تعطیلات کی مدت ۲۶دسمبر ۲۰۲۵ سے۱۰ جنوری ۲۰۲۶ تک مقرر کی گئی ہے، جبکہ نویں سے بارہویں جماعت کے طلبہ ۲۹دسمبر ۲۰۲۵ سے۱۰ جنوری ۲۰۲۶ تک سرمائی تعطیلات پر رہیں گے۔
حکم نامے میں مزید کہا گیا ہے کہ تعطیلات کے دوران تدریسی عملہ ضرورت پڑنے پر کسی بھی تعلیمی سرگرمی کے لیے دستیاب رہے گا۔ اس کے علاوہ ہدایت دی گئی ہے کہ تمام اساتذہ ۱۰جنوری ۲۰۲۶ کو اپنی متعلقہ درسگاہوں میں رپورٹ کریں گے۔
ڈائریکٹوریٹ نے خبردار کیا ہے کہ اداروں کے سربراہان یا تدریسی عملے کی جانب سے طے شدہ شیڈول کی خلاف ورزی یا کوتاہی کی صورت میں متعلقہ قواعد کے تحت سخت کارروائی عمل میں لائی جائے گی۔
یہ حکم مجاز اتھارٹی کی منظوری کے بعد جاری کیا گیا ہے اور اس پر سختی سے عمل درآمد کے لیے تمام متعلقہ محکموں اور افسران کو ارسال کر دیا گیا ہے۔