آتش فشاں پھٹنے پر پروازوں کے تعلق سے حکومت کا بیان

نئی دہلی، 25 نومبر (یو این آئی) مرکزی حکومت نے منگل کے روز کہا کہ وہ ایتھوپیا میں ہیلّی گُبّی آتش فشاں پھٹنے کے بعد کی صورتحال پر مسلسل نظر رکھ رہی ہے اور فی الحال پروازوں کے سلسلے میں فکر کی کوئی بات نہیں ہے ۔ وزارتِ شہری ہوا بازی نے منگل کے روز سوشل میڈیا پلیٹ فارم ایکس پر ایک پوسٹ میں بتایا کہ آتش فشاں سے اٹھنے والے بادل مشرق کی سمت بڑھ رہے ہیں۔
اس صورتحال میں وہ اے ٹی سی، محکمۂ موسمیات، ایئرلائن کمپنیوں اور بین الاقوامی ہوا بازی ایجنسیوں کے ساتھ بغیر رکاوٹ ہم آہنگی یقینی بنا رہا ہے ۔ انڈین ایئرپورٹس اتھارٹی (اے اے آئی) نے پائلٹوں کے لیے ضروری نوٹس جاری کیا ہے ۔ پوسٹ میں کہا گیا ہے کہ ”پورے ملک میں آپریشن میں کوئی رکاوٹ نہیں آئی ہے ، البتہ احتیاط کے طور پر کچھ پروازوں کے روٹ بدلے گئے ہیں یا انہیں منسوخ کیا گیا ہے ۔”
فی الحال فکر کی کوئی وجہ نہیں ہے ۔ وزارت نے کہا کہ وہ صورتحال پر مسلسل نظر رکھے ہوئے ہے ۔ قابلِ ذکر ہے کہ ایتھوپیا کے شمالی علاقے میں اتوار کے روز ہیلّی گُبّی آتش فشاں دس ہزار سال سے زیادہ عرصے کے بعد سرگرم ہوا ہے ۔ اس سے اٹھنے والے بادل ہندوستان کی جانب بھی پہنچے ہیں۔ مغربی ایشیا کے شہروں کی جانب جانے والی اور اس علاقے سے گزرنے والی کئی پروازیں اس سے متاثر ہوئی ہیں۔