کرناٹک میں وزیرِ اعلیٰ کی تبدیلی کے مطالبے پر گھمسان جاری

نئی دہلی، 24 نومبر (یو این آئی) کرناٹک میں وزیرِ اعلیٰ کو بدلنے کے مطالبے پر رسہ کشی ابھی بھی جاری ہے اور چھ سے زیادہ کانگریس کے ایم ایل اے اتوار کی دیر شام دہلی پہنچ گئے ۔ گزشتہ ایک ہفتے سے کانگریس ارکانِ اسمبلی کا دہلی آنا مسلسل جاری ہے ۔
ذرائع کے مطابق ان دنوں کرناٹک کانگریس میں سیاسی ہلچل بہت تیز ہو چکی ہے ۔ نائب وزیرِ اعلیٰ ڈی کے شیوکمار کے حامی ایم ایل اے وزیرِ اعلیٰ کی تبدیلی کے مطالبے کے ساتھ دہلی میں کانگریس اعلیٰ قیادت سے ملاقات کی کوشش کر رہے ہیں۔ پچھلے ایک ہفتے میں یہ تیسری بار ہے کہ شیوکمار گروپ کے ایم ایل اے دہلی آئے ہیں۔
دہلی میں جمع تمام ایم ایل اے وزیرِ اعلیٰ سِدارمیا کے خلاف ناراضگی ظاہر کر رہے ہیں۔ اراکینِ اسمبلی کا کہنا ہے کہ پارٹی میں سب کچھ ٹھیک نہیں چل رہا اور اعلیٰ قیادت کو اس معاملے میں فیصلہ لینا چاہیے ۔ یہ ایم ایل اے اعلیٰ قیادت کے جواب کا انتظار کر رہے ہیں۔
ذرائع کے مطابق ایم ایل اے کا غصہ بجٹ کی تقسیم، ٹکٹوں کے بٹوارے اور اقتدار میں شراکت داری جیسے امور سے متعلق ہے ۔
واضح رہے کہ کانگریس صدر ملکارجن کھڑگے بنگلورو میں مقامی رہنماؤں کے ساتھ مسلسل ملاقاتوں میں مصروف ہیں۔ کرناٹک میں وزیرِ اعلیٰ کی تبدیلی کے سوال پر مسٹر کھڑگے نے کہا ہے کہ جلدبازی میں کوئی قدم نہیں اٹھایا جائے گا۔