سرینگر/۲۴نومبر
وادیٔ کشمیر کے معروف سیاحتی مقام درنگ واٹر فال نے عارضی بندش کے بعد ایک بار پھر اپنی پرکشش فطری خوبصورتی کے ساتھ سیاحوں کا خیرمقدم شروع کر دیا ہے ۔
گزشتہ چند مہینوں سے بند رہنے کے بعد جب انتظامیہ نے درنگ کو باضابطہ طور پر دوبارہ کھولنے کا اعلان کیا تو سیاحوں کی بڑی تعداد نے یہاں کا رخ کیا اور پورے علاقے میں پھر سے رونق لوٹ آئی۔
درنگ، جو برفیلی آبشار، سبزہ زاروں، گنگناتی ندیاں، غار نما قدرتی ساخت اور پتھریلی راستوں کے سبب کشمیر کی منفرد شناخت سمجھا جاتا ہے ، ایک بار پھر سیاحوں کی موجودگی سے گونج اٹھا ہے ۔ بندش کے دوران مقامی کاروباری طبقہ، جس میں گھوڑے والے ، ریڑھی دار، فوٹو گرافرز، گائیڈز اور چھوٹے دکاندار شامل ہیں، شدید مالی مشکلات سے دوچار تھا لیکن سیاحوں کی واپسی نے انہیں نئی امید بخشی ہے ۔
حکام کے مطابق درنگ کو حفاظتی وجوہات کے باعث عارضی طور پر سیاحوں کے لیے بند کیا گیا تھا۔ ہماری اولین ترجیح سیاحوں کی سلامتی ہے ۔ ضروری انفراسٹرکچر اور حفاظتی اقدامات کے بعد آج ہم نے درنگ کو دوبارہ عوام کے لئے کھول دیا ہے ۔
پیر کے روز جیسے ہی درنگ کی بحالی کی خبر پھیلی، گلمرگ اور سری نگر میں قیام پذیر ملکی و غیر ملکی ٹورسٹ گاڑیوں میں بھر بھر کر یہاں پہنچنے لگے ۔ سیاح نہ صرف آبشار کے پس منظر میں تصاویر لیتے رہے بلکہ کئی افراد نے برف سے ڈھکی چٹانوں اور نیچے بہتے نیلگوں پانی کے بیچ گھومنے کا لطف اٹھایا۔
ممبئی سے آئی ایک خاتون سیاح کا کہنا تھا’’ہماری ساری چھٹیاں خطرے میں پڑ گئی تھیں کیونکہ درنگ بند تھا، لیکن آج دوبارہ کھلا تو ہم سیدھے یہیں آگئے ۔ یہ جگہ کسی جنت سے کم نہیں‘‘۔
مقامی دکاندار فیاض احمد نے بتایا کہ سیاحوں کی غیر موجودگی نے مارکیٹ کو تقریباً مفلوج کر دیا تھا۔
انہوں نے کہا’’ہمارے گھروں کا چولہا ٹورسٹ کی وجہ سے جلتا ہے ۔ آج سیاحوں کی واپسی دیکھ کر دل خوش ہوگیا۔ اللہ کرے موسم ٹھیک رہے اور یہاں رش بڑھتا رہے ‘‘۔
درنگ کی مقامی یونین نے بھی انتظامیہ کا شکریہ ادا کرتے ہوئے کہا کہ بہتر سہولیات کی فراہمی سے نہ صرف سیاحت کو فروغ ملے گا بلکہ روزگار کے مواقع بھی بڑھیں گے ۔
درنگ، گلمرگ کے کنارے پر واقع ایک فطری شاہکار ہے جو ہر موسم میں اپنی الگ خوبصورتی پیش کرتا ہے -گرمیوں میں سبزہ اور پانی کا شور، سردیوں میں جمے ہوئے آبشار کا دلفریب منظر، اور خزاں میں سنہری پتوں کا جادو۔اسی منفرد حسن نے اسے اس سال کی صفِ اول کے ٹورزم سپاٹس میں شامل کر دیا ہے ۔
امید کی جا رہی ہے کہ آنے والے ہفتوں میں یہاں سیاحوں کی تعداد میں مزید اضافہ ہوگا اور درنگ اپنی کھوئی ہوئی چہل پہل کو دوبارہ پوری شان کے ساتھ حاصل کرے گا۔
