بالی ووڈ کی ہر ایک فلم ہٹ یا سپر ہٹ نہیں ہو تی ہے… نہیں ہو سکتی ہے ۔ کوئی کوئی ہٹ یا سپر ہٹ ہو تی ہے‘ لیکن ہر ایک نہیں … بالکل بھی نہیں ۔ کئی پرڈوسر حضرات ڈوب جاتے ہیں اور کئی کی نیا پار لگ جاتی ہے… لیکن ایک بات ضرور ہے کہ شو جاری ہے… شو جاری رہتا ہے ‘ یہ رکتا نہیں ہے… بالی ووڈ فلمیں بناتا رہتا ہے… نتائج کی فکر کئے بغیر… نہیں صاحب ہمیں بالی ووڈ اور وہاں تیار کی جانی والی فلموں میں کوئی دلچسپی نہیں ہے… بالکل بھی نہیں ہے… کبھی رہی ہو گی لیکن اب نہیں ہے… رہا سوال پھر ہم بالی ووڈ کی بات کیوں کررہے ہیں تو… تو صاحب جواب یہ ہے کہ ہم سوچتے ہیں کہ فلم ہٹ ہونے میں اس کے اداکاروں کا بھی ایک اہم رول ہوتا ہے… اگر بالی ووڈ ایک آدھ سال فلمیں بنانے کا کام ‘ فلموں میں ادا کاری کی ذمہ داری کشمیر کے سیاستدانوں کو تفویض کرے گا تو … تو کیا ہو گا…کیا ہی اچھا ہو گا کہ ہم آپ کو یقین دلاتے ہیں کہ… کہ اس دوران ایک بھی فلم… جی ہاں ایک بھی فلم پٹ نہیں جائیگی بلکہ ہٹ جائیگی اور… اور اس لئے ہٹ جائیگی کہ… کہ اللہ میاں کی قسم کشمیر کے سیاستدانوں سے بہتر ادا کار کوئی نہیں ہو سکتا ہے… ملک بھر میں آپ کو ڈھونڈنے سے بھی ان جیسا کوئی نہیں ملے گا…بالکل بھی نہیں ملے گا۔ اس میں کوئی امتیاز نہیں ہے… سبھی جماعتوں میں ایک سے بڑ ھ کر ایک ادا کار ہے… کیا چھوٹی جماعت اور کیا بڑی … کیا حکمران جماعت اور کیا اپوزیشن… ایسے ایسے ہیرے ان کے ہاں ہیں کہ… کہ اگر کبھی ان کا مقابلہ بالی ووڈ کے نامی گرامی اداکاروں سے ہو جائیگا تو…وہ چاروں خانے چِت ہو جائیں گے… کشمیر کے سیاستدانوںکے سامنے کوئی بھی بالی ووڈ ادا کار ٹک نہیں پائیگا … بالکل بھی نہیں پائیگا …ویسے بھی کشمیر میں اور کشمیر کے حوالے سے نت نئے تجربے ہوتے رہتے ہیں… اگر ایک آدھ تجربہ یہ بھی ہوجائیگا تو… تو اس میں برا ہی کیا ہے کہ… کہ بہت سے پرڈوسروں کا سرمایہ بچ جائیگا… ڈوبنے سے بچ جائیگا کہ… کہ ہم آنکھیں بند کرکے اس بات کی ضمانت دینے کیلئے تیار ہیںکہ کشمیر کے سیاستدانوں جیسا ادا کار کوئی نہیں ہے… کوئی نہیں ہو سکتا ہے… بالکل بھی نہیں ہو سکتا ہے ۔ ہے نا؟
کشمیر کے سیاستدان‘بہترین اداکار
