سیوان میں خاندانی مافیا راج کی واپسی کسی بھی قیمت پربرداشت نہیں: یوگی

لکھنؤ/سیوان:31 اکتوبر (یواین آئی) اتر پردیش کے وزیر اعلیٰ یوگی آدتیہ ناتھ نے بہار کے سیوان اسمبلی حلقے میں عوامی اجتماع سے خطاب کرتے ہوئے واضح پیغام دیا کہ بہار میں کسی بھی صورت میں خاندانی مافیا اور مافیا راج کی واپسی برداشت نہیں کی جائے گی۔ یوگی نے کہا کہ سیوان کی سرزمین پر دوبارہ خوف اور دہشت کی حکومت نہیں بیٹھنے دیں گے ۔
یوگی آدتیہ ناتھ نے کہا کہ این ڈی اے حکومت بہار میں چندر گپت اور چانکیہ کے دور جیسی شان و شوکت واپس لائے گی، بہار کو دوبارہ سنہری دور کی طرف لے جایا جائے گا۔
یوگی آدتیہ ناتھ نے بہار میں مسلسل ہونے والی موسلادھار بارش کے باوجود عوام کے جوش و خروش پر ان کا شکریہ ادا کیا اور خیر مقدم کیا۔ انہوں نے کہا کہ میں دودن قبل رگھوناتھ پور آیا تھا، کیونکہ ایک خاندانی مافیا وہاں پر دوبارہ قبضہ کرنا چاہتا ہے ۔
انہوں نے کہا کہ یوپی میں ہم نے بلڈوزر سے روند روند کر ایسے مافیاؤں کا کچومر نکال کر یوپی کی سرزمین سے جہنم کے راستے کھول دیے ہیں۔ یوگی آدتیہ ناتھ نے کہا کہ ہماری سیتا مئیّہ کی سرزمین پر کوئی ماریچ اور سُباہو دوبارہ سر نہیں اٹھا سکے گا۔
یوگی آدتیہ ناتھ نے مخالف جماعتوں کو نشانہ بناتے ہوئے کہا کہ کئی لوگ اپنے اپنے طریقے سے لوگوں کی آنکھوں میں دھول جھونکنے کا کام کر رہے ہیں، جنہوں نے بہار کے سامنے پہچان کا بحران کھڑا کیا تھا اور جن کی وجہ سے سیوان کے باشندے خوف اور دہشت میں جینے پر مجبور تھے ۔ انہیں دوبارہ کسی بھی حال میں واپس نہیں آنے دینا ہے ۔
انہوں نے کہا کہ یہ لڑائی صرف اقتدار کی نہیں، بلکہ بہار کی عظمت کی لڑائی ہے ۔ بہار کی آن، بان، شان اور شاندار روایت کو دوبارہ قائم کرنے کی لڑائی ہے ۔ بہار کو پھر سے سنہری دور کی طرف لے جانے کی لڑائی ہے ۔ بہار نے پورے ہندوستان کو سنہری دور کا نظارہ کرایا تھا۔
یوگی نے کہا کہ ہندوستان تب ترقی کرے گا جب بہار ترقی کرے گا۔ جب بہار ترقی کرے گا تو ہندوستان کو ترقی کرنے سے کوئی نہیں روک سکتا۔
یوگی آدتیہ ناتھ نے کہا کہ آر جے ڈی کے دور میں بہار میں جرائم اور اغوا ایک صنعت بن چکا تھا۔ آر جے ڈی کے راج میں کس طرح کی انارکی، غنڈہ گردی اور خاندان پرستی حاوی تھی، ایک ہی خاندان کے رشتہ دار اور ناتے دار پورے بہار کو روندنے کا کام کر رہے تھے ۔ نوجوانوں کے سامنے شناخت کا بحران کھڑا کر رہے تھے ۔ انسان تو دور، جانوروں کا چارہ ہضم کرکے نوجوانوں کے سامنے شدید بحران کھڑا کر دیا تھا۔
یوگی نے کہا کہ ہندوستان وزیر اعظم مودی کا شکر گزار ہے ۔ ایک غریب کے گھر میں پیدا ہونے والے اور ایک عام شہری کے طور پر اپنا روزمرہ کا کام کرنے والے نریندر مودی نے 2014 میں ہندوستان کی باگ ڈور سنبھالی۔ آج ملک میں 80 کروڑ لوگوں کو مفت راشن، 50 کروڑ لوگوں کو آیوشمان بھارت یوجنا سے مفت ہیلتھ انشورنس، 12 کروڑ گھروں میں بیت الخلاء، 45 کروڑ غریبوں کا بینک کھاتہ کھلوانے کے بعد، پنشن اور اسکالرشپ براہ راست اکاؤنٹ میں دینے کا کام این ڈی اے نے مودی اور نتیش بابو کی قیادت میں کیا ہے ۔