سرینگر/۳۱؍اکتوبر
جموں کشمیر میں ریٹائرڈ سرکاری ملازمین کے واجبات کی مجموعی رقم۴۴۶۸کروڑ روپے تک پہنچ گئی ہے ، جس میں جی پی فنڈ، گریجویٹی، کمیوٹیشن اور لیو سیلری کے واجبات شامل ہیں۔ حکومت نے اعتراف کیا ہے کہ یہ واجبات تاحال ادا نہیں کیے جا سکے ہیں۔
سرکاری اعداد و شمار کے مطابق جنرل پروویڈنٹ فنڈ (کے تحت۲۳۹۰ کروڑ روپے‘ گریجویٹی کے۱۵۳۷ کروڑ، کمیوٹیشن کے۳۳۲کروڑ اور لیو سیلری کے۲۰۹کروڑ روپے واجب الادا ہیں۔
محکمہ خزانہ کے مطابق، تمام واجبات کی ادائیگی دستیاب وسائل کی بنیاد پر مرحلہ وار کی جا رہی ہے ۔ ایک بیان میں کہا گیا ہے کہ ادائیگیوں کو منظم انداز میں کلیئر کیا جا رہا ہے تاکہ مالی توازن برقرار رہے اور تمام سیکٹروں کی ضروریات پوری کی جا سکیں۔
حکومت نے مزید بتایا کہ فوری نوعیت کے معاملات جیسے صحت کے اخراجات، شادی، بچوں کی فیس یا زیارت کے لیے مالی معاونت کو ترجیحی بنیادوں پر نمٹانے کے لیے دو سینئر افسران کو نامزد کیا گیا ہے ، ایک سرینگر اور دوسرا جموں میں تاکہ ایسے کیسوں کی فوری منظوری ممکن ہو سکے ۔
محکمہ خزانہ نے یقین دہانی کرائی ہے کہ بقیہ واجبات کی ادائیگی دستیاب وسائل کے مطابق جلد از جلد مکمل کی جائے گی تاکہ ریٹائرڈ ملازمین کو درپیش مشکلات میں کمی لائی جا سکے ۔
