کرور بھگدڑ کی جانچ سی بی آئی نے سنبھالی

نئی دہلی، 17 اکتوبر (یو این آئی) سنٹرل بیورو آف انویسٹی گیشن (سی بی آئی) نے 27 ستمبر کو تمل ناڈو کے کرور میں اداکار سے سیاست دان بنے وجے کی ،تملگا ویٹری کزگم (ٹی وی کے ) پارٹی کے زیر اہتمام ایک ریلی کے دوران بھگدڑ کی باضابطہ تحقیقات سنبھال لی ہے ۔ اس حادثے میں 41 افراد جاں بحق ہو گئے تھے
سی بی آئی کی ایک ٹیم جمعہ کی صبح تمل ناڈو پہنچی اور توقع ہے کہ وہ کرور میں جائے حادثہ کا دورہ کرے گی ۔ تحقیقات کے ایک حصے کے طور پر ، حکام زندہ بچ جانے والوں اور متاثرین کے اہل خانہ سے مل کر ان کے بیانات ریکارڈ کریں گے ۔
سپریم کورٹ نے حادثے کی تحقیقات ایک وفاقی ایجنسی کے حوالے کر دی تھی ۔ سپریم کورٹ نے حال ہی میں مدراس ہائی کورٹ کے اس حکم کو منسوخ قرار دیا تھا جس میں اس حادثے کی جانچ خصوصی تفتیشی ٹیم (ایس آئی ٹی) سے کرانے کی ہدایت دی گئی تھی ۔ ہائی کورٹ نے اس سے قبل ایس آئی ٹی تشکیل دی تھی ، جس کی سربراہی افسر آشا گرگ کر رہی تھیں ۔
مسٹر وجے کی قیادت میں ٹی وی کے پارٹی نے ہائی کورٹ کے ایس آئی ٹی جانچ کے حکم کو سپریم کورٹ میں چیلنج کیا تھا ۔ جسٹس جے کے مہیشوری اور این وی انجاریا پر مشتمل بنچ نے سی بی آئی کو تین رکنی کمیٹی کی نگرانی میں تحقیقات کرنے کی ہدایت کی ۔ اس کمیٹی کی سربراہی سپریم کورٹ کے سابق جج جسٹس اجے رستوگی کر رہے ہیں ۔ کمیٹی میں تمل ناڈو کیڈر کے دو انڈین پولیس سروس (آئی پی ایس) افسران بھی شامل ہوں گے جو اس ریاست کے باشندے نہیں ہوں گے ۔ دونوں افسران کو انسپکٹر جنرل آف پولیس (آئی جی پی) کے عہدے سے کم نہیں ہونا چاہیے اور ان کا تقرر جسٹس رستوگی کریں گے ۔