جموں/۱۷؍اکتوبر
منشیات فروشوں کے خلاف سخت کارروائیوں کو جاری رکھتے ہوئے پولیس نے ضلع اودھم پور میں ایک منشیات فروش کی ۱۶ لاکھ روپیے مالیت کی منقولہ جائیداد کو ضبط کیا ہے۔
ایک پولیس ترجمان نے بتایا کہ اودھم پور پولیس نے این ڈی پی ایس ایکٹ کے تحت ایک بڑی کارروائی میں ایک منشیات فروش کی ۱۶؍ لاکھ روپے مالیت کی منقولہ جائیداد کو ضبط کر دیا۔انہوں نے کہا کہ یہ کارروائی این ڈی پی ایس ایکٹ کی دفعہ ایف ۶۸ کے تحت انجام دی گئی۔
منشیات فروش کی شناخت محمد عارف ولد محمد ایوب ساکن ہر شیلا ضلع ڈوڈہ کے طور پر کی گئی ہے۔ان کا کہنا ہے کہ ضبط شدہ جائیداد میں ایک انووا کار شامل ہے۔
پولیس ترجمان نے بتایا کہ ضبطی کا حکم تفتیشی افسر نے این ڈی پی ایس ایکٹ کے تحت درج ایف آئی آر نمبر۱۴۵/۲۰۲۵ کی تحقیقات کے دوران جاری کیا جب یہ ثابت ہوا کہ مذکورہ گاڑی جرم سے حاصل شدہ رقم سے خریدی گئی ہے۔انہوں نے کہا کہ اودھم پور پولیس معاشرے کو منشیات کی لعنت سے پاک بنانے کے لئے پر عزم ہے۔
ان کا کہنا ہے کہ منشیات سے متعلق جرائم میں ملوث افراد کے خلاف سخت قانونی کارروائی انجام دی جائے گی۔
دریں اثنا پولیس نے ضلع اودھم پور میں الگ الگ کارروائیوں کے دوران دو منشیات فروشوں کو گرفتار کرکے ان کی تحویل سے ہیروئن جیسا ممنوعہ مواد بر آمد کیا ہے۔
ایک پولیس ترجمان نے اپنے ایک بیان میں کہا کہ پولیس اسٹیشن مجالتہ کی ایک ٹیم نے باتل میں معمول کے ناکے کے دوران ایک سکوٹی کو روکا جو منوال سے باتل کی طرف جا رہی تھی۔
ترجمان نے کہا کہ تلاشی کے دوران سکوٹی ڈرائیور کی تحویل سے ۶۹ء۵گرام ہیروئن بر آمد کیا گیا جس کے بعد اس کو موقع پر ہی گرفتار کیا گیا۔
ملزم کی شناخت محمد شریف ولد مرزا خان ساکن دامہ مجالتہ کے طور پر کی گئی۔
ترجمان کا کہنا ہے کہ اس ضمن میں پولیس اسٹیشن مجالتہ میں این ڈی پی ایس ایکٹ کے تحت زیر ایف آئی آر نمبر۸۴/۲۰۲۵درج کیا گیا اور مزید تحقیقات شروع کی گئی۔
پولیس ترجمان نے بتایا کہ اسی نوعیت کے ایک اور واقعے میں ایک پولیس ٹیم نے مجالتہ موڈ پر ایک شخص کو روکا جو پیدل چل رہا تھا۔انہوں نے کہا کہ تلاشی کے دوران اس کی تحویل سے ۵گرام ہیروئن بر آمد کیا گیا جس کے بعد اس کو بر سر موقع ہی گرفتار کیا گیا۔
ملزم کی شناخت غفور علی ولد محمد صادق ساکن دامہ مجالتہ کے طور پر کی گئی۔ان کا کہنا ہے کہ اس ضمن میں پولیس اسٹیشن مجالتہ میں این ڈی پی ایس ایکٹ کے تحت زیر ایف آئی آر نمبر۸۵/۲۰۲۵درج کیا گیا اور مزید تحقیقات شروع کی گئی۔ایجنسیز
