گوگل وشاکھاپٹنم میں ملٹی گیگا واٹ اے آئی ہب پروجیکٹ میں 15 بلین ڈالر کی سرمایہ کاری کرے گا

نئی دہلی، 14 اکتوبر (یواین آئی) عالمی انفارمیشن ٹیکنالوجی اور انٹرنیٹ سرچ انجن کمپنی گوگل نے منگل کو آندھرا پردیش کے وشاکھاپٹنم میں ایک گیگا واٹ کا ڈیٹا سینٹر قائم کرنے کے منصوبے کا اعلان کیا اور اگلے پانچ سالوں میں 15 بلین ڈالر کی سرمایہ کاری کا اعلان کیا۔ یہ امریکہ سے باہر کمپنی کا سب سے بڑا مرکز ہوگا۔
کمپنی نے کہا کہ اس ڈیٹا سینٹر کو ایک عالمی اے آئی مرکز کے طور پر تیار کیا جائے گا، جو ایشیا اور دنیا کے دیگر ممالک کی خدمت کرے گا۔ اس مقصد کو حاصل کرنے کے لیے گوگل نے زیر سمندر کمیونیکیشن کیبل لینڈنگ اسٹیشن اور ڈیجیٹل کمیونیکیشن انفراسٹرکچر تیار کرنے کا منصوبوں کا اعلان کیا ہے ۔
یہاں انڈیا اے آئی پاور سمٹ میں اعلان کرتے ہوئے گوگل کلاؤڈ گلوبل کے سی ای او تھامس کورین نے کہا کہ یہ امریکہ سے باہر گوگل کا سب سے بڑا ڈیٹا سینٹر ہوگا۔ کمپنی 12 ممالک میں ڈیٹا سینٹرز کا نیٹ ورک بنا رہی ہے ۔
اس موقع پر مرکزی وزیر خزانہ نرملا سیتا رمن، وزیر اعلیٰ این چندرابابو نائیڈو، مرکزی وزیر برائے اطلاعات و نشریات، ریلوے ، اور انفارمیشن ٹیکنالوجی اور الیکٹرانکس، اشونی ویشنو، آندھرا پردیش کے وزیر برائے الیکٹرانکس، نارا لوکیش، اور دیگر معززین موجود تھے ۔ مسٹر کورین نے کہا کہ وشاکھاپٹنم اے آئی ہب کی صلاحیت آخرکار کئی گیگا واٹ ہوگی۔
قبل ازیں، آندھرا پردیش حکومت اور گوگل کے حکام نے وشاکھاپٹنم ہائپر اسکیل ڈیٹا سینٹر کیمپس کے لیے کمپنی کے ساتھ ایک معاہدے پر دستخط کیے تھے ۔ یہ مرکز نائیڈو حکومت کے اے آئی سٹی وشاکھاپٹنم پروجیکٹ کے مرکز کے طور پر کام کرے گا۔ یہ گوگل کے سب سے بڑے ایشیائی پروجیکٹوں میں سے ایک ہوگا، جو اے آئی کی تبدیلی کو تیز کرے گا، صاف توانائی کے انضمام، اور ہندوستان میں 180,000 ملازمتیں پیدا کرے گا۔