اے پی کے کوناسیما ضلع کے املاپورم میں ویک اینڈ سائیکلنگ۔ صحت اور سکون کی نئی راہ

حیدرآباد 14اکتوبر(یواین آئی)آج کے مصروف اور دباؤ بھرے دور میں لوگ ذہنی و جسمانی طور پر تھکن کا شکار ہو رہے ہیں۔ کام کے بوجھ اور بے ترتیب طرزِ زندگی نے ان کی روزمرہ کی پرسکون زندگی چھین لی ہے ۔ ایسے میں بہت سے افراد اپنے تناؤ کو کم کرنے کے لئے مختلف سرگرمیوں کا سہارا لے رہے ہیں۔ انہی میں ایک رجحان املاپورم کے شہریوں میں تیزی سے فروغ پا رہا ہے ویک اینڈ سائیکلنگ۔
کوناسیما ضلع کے املاپورم میں سرکاری ملازمین، تاجر اور ریٹائرڈ افراد نے ایک سائیکلنگ گروپ تشکیل دیا ہے ۔ یہ گروپ ہر اتوار اور تعطیل کے دن تقریباً 30 سے 40 کلومیٹر کا سفر سائیکلوں پر طے کرتا ہے ۔ ہر ہفتے ایک نیا راستہ منتخب کیا جاتا ہے ، جیسے املاپورم سے الورم، پاشری لپوڈی وغیرہ کے دیہی راستے ۔ وہ صبح سویرے نکلتے ہیں، قدرتی مناظر سے لطف اندوز ہوتے ہیں اور بعد میں واپس لوٹتے ہیں۔ عام دنوں میں یہی گروپ مقامی ایس کے بی آر کالج میں واک اور ورزش بھی کرتا ہے ۔
یہ گروپ فطرت کے قریب رہ کر ذہنی سکون حاصل کرنا چاہتا ہے ۔ قابلِ ذکر بات یہ ہے کہ اس میں 40 سے 60 سال کی عمر کے افراد بھی شامل ہیں۔ سائیکلنگ کے دوران وہ دیہی علاقوں میں موجود پرانے ہوٹلوں میں روایتی ناشتے سے لطف اندوز ہوتے ہیں، پندرہ منٹ آرام کر کے دوبارہ سفر شروع کرتے ہیں۔ راستے میں آنے والے قدرتی حسین مناظر کو موبائل کیمروں میں قید کرتے ہوئے یہ لوگ فطرت کی خاموشی میں آگے بڑھتے ہیں۔
گروپ کے ایک رکن ستیاناراینا راجو نے بتایا کہ وہ نیدونور کے رہنے والے ہیں اور املاپورم میں مقیم ہیں۔ انہوں نے تقریباً چار سال قبل چند دوستوں کے ساتھ تفریحی طور پر ویک اینڈ سائیکلنگ شروع کی تھی، جو اب روزمرہ کی عادت بن گئی ہے ۔ ان کا کہنا ہے کہ اس عمل سے صحت میں واضح بہتری آئی ہے اور ایک نئی توانائی حاصل ہو رہی ہے ۔ گروپ کے دیگر اراکین بھی اسے جسمانی اور ذہنی فٹنس کے لیے مفید قرار دے رہے ہیں۔
سائیکلنگ کے فوائد سے واقف کرواتے ہوئے انہوں نے کہاکہ سائیکلنگ سے جسم کے تمام اعضا متحرک رہتے ہیں۔
گھٹنوں پر زیادہ دباؤ نہیں پڑتا، جوڑوں کے درد کے مریضوں کے لئے بہترین ورزش ہے ۔
وزن میں کمی کے ساتھ ساتھ شوگر اور بلڈ پریشر پر قابو پانے میں مدد ملتی ہے ۔
ٹانگوں کے پٹھے مضبوط ہوتے ہیں۔
دل کی خون رسانی بہتر ہوتی ہے اور قوتِ برداشت میں اضافہ ہوتا ہے ۔
املاپورم کے یہ شہری مثال بن چکے ہیں کہ اگر ارادہ پختہ ہو تو مصروف زندگی میں بھی صحت، سکون اور خوشی حاصل کی جا سکتی ہے ۔