کوکرناگ میں انسداد دہشت گرد آپریشن کے دوران ۲فوجی لاپتہ

سرینگر/۸؍اکتوبر
جنوبی ضلع اننت ناگ کے کوکرناگ سب ڈویژن کے گڈول علاقے میں دو فوجی پیر کے روز سے لاپتہ ہیں۔
ذرائع نے بتایا کہ اہلکاروں کا ڈیوٹی کے دوران رابطہ منقطع ہو گیا، جس کے بعد فوراً سرچ اور ریسکیو آپریشن کا آغاز کیا گیا۔
ذرائع نے بتایا کہ خراب موسم اور مشکل پہاڑی راستوں کی وجہ سے فوجی راستہ بھٹک گئے ہوں گے ۔ علاقے میں فوج اور مقامی انتظامیہ کی ٹیمیں دن بھر مختلف دشوار گزار مقامات پر تلاش کر رہی ہیں تاکہ فوجیوں کو جلد از جلد محفوظ بازیاب کیا جا سکے ۔
ذرائع کے مطابق، دونوں فوجی پیر کے روز لاپتہ ہوئے اور تاحال ان کا کوئی سراغ نہیں ملا۔ سرچ آپریشن میں فوجی دستے کے علاوہ مقامی انتظامیہ کی ٹیمیں بھی شامل ہیں، اور علاقے کے مکینوں سے تعاون کی اپیل کی گئی ہے ۔ حکام نے لوگوں کو ہدایت دی ہے کہ تلاش کے دوران محتاط رہیں اور علاقے میں غیر ضروری نقل و حمل سے گریز کریں۔
دفاعی ذرائع نے کہا ہے کہ تلاش جاری ہے اور تمام دستیاب وسائل استعمال کیے جا رہے ہیں تاکہ فوجیوں کی بازیابی کو یقینی بنایا جا سکے ۔
دریں اثنا جموں کے ضلع راجوری میں بدھ کو تلاشی آپریشدن جاری رہا، تاہم پولیس اور دہشت گردوں کے درمیان گزشتہ روز ہونے والی مختصر فائرنگ کے بعد سکیورٹی فورسز اور دہشت گردوں کے مابین دوبارہ آمنا سامنا نہیں ہوا۔
اطلاعات کے مطابق راجوری ضلع کے گاؤں ڈھار سکھری میں بدھ کے روز سرچ آپریشن جاری رہا، جہاں منگل کی شام پولیس اور دہشت گردوں کے درمیان فائرنگ کا تبادلہ ہوا تھا۔ حکام نے بتایا کہ علاقے میں مزید فورسز پہنچا دی گئی ہیں اور بدھ کی صبح تک علاقے میں کسی بھی طرح کی فائرنگ نہیں ہوئی۔
پولیس ذرائع کے مطابق فوج، نیم فوجی دستے اور پولیس کے اہلکار علاقے میں محاصرہ برقرار رکھنے کے لیے پہنچ گئے تاکہ دہشت گرد رات کے دوران فرار نہ ہو سکیں۔ سینئر افسران بھی موقع پر موجود ہیں اور مقامی لوگوں سے کہا گیا ہے کہ وہ اپنے گھروں میں رہیں جب تک علاقے کو دہشت گردوں سے کلیئر نہیں کیا جاتا۔
اسی دوران، بدھ کو ادھمپور ضلع کے بسنت گڑھ کے ڈھارنی ٹاپ علاقے میں بھی سکیورٹی فورسز نے سرچ آپریشن شروع کیا۔ یہ کارروائی اس وقت شروع ہوئی جب مقامی لوگوں نے تین مشتبہ دہشت گردوں کی نقل و حرکت کی اطلاع دی۔ بسنت گڑھ کے جنگلات میں پہلے بھی دہشت گردوں کی نقل و حرکت دیکھی گئی تھی، جس کے نتیجے میں یہاں متعدد آپریشنز اور ماضی میں فائرنگ کے تبادلے بھی ہوئے ہیں۔
خیال رہے کہ ۲۶جون کو بسنت گڑھ میں دہشت گردوں کے ایک بڑے کمانڈر، حیدر المعروف مولوی، کو ہلاک کیا گیا تھا۔ سکیورٹی فورسز پورے جموں و کشمیر میں دہشت گردوں، ان کے اوورگراؤنڈ ورکرز اور حامیوں کے خلاف کارروائیاں کر رہی ہیں تاکہ دہشت گردی کے نیٹ ورک کو ختم کیا جا سکے ۔ویب ڈیسک