اندرراج سنگھ نے لوگوں سے دہلی کو صاف ستھرا بنانے کی اپیل کی

نئی دہلی، 23 ستمبر (یو این آئی) دہلی کے سماجی فلاح و بہبود کے وزیر رویندر اندراج سنگھ نے صفائی ملازمین کے ساتھ تعاون کی اپیل کرتے ہوئے کہا کہ ‘شرمدان’ کے ذریعے دہلی کو صاف بنانے میں سب کو حصہ لینا چاہیے ۔
مسٹر اندراج نے "سیوا پکھواڑا” کے تحت منگل کے روز شالیمار باغ میں مقامی شہریوں، متعدد سماجی تنظیموں اور صفائی ملازمین کے ساتھ صفائی ستھرائی سے متعلق مہم میں حصہ لیا۔ انہوں نے کہا کہ وزیر اعظم نریندر مودی کی قیادت میں "سوچّھ بھارت ابھیان” ایک عوامی تحریک بن چکی ہے ۔ اس تحریک کے تحت اب وزیر اعلیٰ ریکھا گپتا کی قیادت میں ترقی یافتہ دہلی کے ہدف کے لیے راجدھانی کے عوام پوری لگن سے دہلی کو کچرے سے پاک بنانے کی کوشش کر رہے ہیں۔
انہوں نے کہا کہ پانی کی بوتلیں، فوڈ ریپر اور پلاسٹک کے تھیلے اِدھر اُدھر پھینکنے سے صفائی ملازمین کے لیے انہیں اکٹھا کرنا مشکل ہوتا ہے اور یہ نالیوں میں جا کر نالیوں کو بند کر دیتے ہیں جس سے پانی جمع ہونے کا مسئلہ پیدا ہوتا ہے ۔ انہوں نے عوام سے اپیل کی کہ صفائی ملازمین کا تعاون کریں اور باقاعدہ شرمدان کے ذریعے دہلی کو صاف ستھرا بنائیں۔ صفائی اور حفظانِ صحت پر عمل کرنے سے صحت بہتر رہے گی اور علاج پر خرچ کم ہوگا۔
مسٹر اندراج نے دہلی کے عوام سے اپیل کی کہ اگر ہمیں ترقی یافتہ دہلی بنانی ہے تو صاف دہلی کا عزم بھی کرنا ہوگا۔ انہوں نے کہا کہ "سوچّھ بھارت” صرف ایک سرکاری مہم نہیں بلکہ ہر شہری کی ذمہ داری ہے ۔ آئیے ہم سب اسے اپنی زندگی کا حصہ بنا کر ایک نئے ، مضبوط ہندوستان اور صاف دہلی کی تعمیر میں اپنا تعاون دیں۔