ریاستی درجے کی بحالی ‘لداخ

ماحولیاتی کارکن سونم وانگچک نے ایپکس باڈی کے ساتھ بدھ کے روز لہیہ میں۳۵روزہ بھوک ہڑتال شروع کرنے کا اعلان کیا۔
بھوک یڑتال لداخ کیلئے ریاستی درجہ اور آئین کے چھٹے شیڈول میں شمولیت کے مطالبے کے سلسلے میں شروع کی گئی ہے ۔
بھوک ہڑتال کے آغاز سے قبل ایک بین المذاہب دعا کی تقریب منعقد کی گئی جس میں امن اور عدم تشدد کے پیغام کو اجاگر کیا گیا۔
پریس کانفرنس سے خطاب کرتے ہوئے وانگچک نے کہا ’’ہمیں اپنی تحریک کو مزید تیز کرنے پر مجبور ہونا پڑ رہا ہے کیونکہ گذشتہ دو ماہ سے مرکزی وزارت داخلہ نے میٹنگ نہیں کی‘‘۔
وانگچک نے کہا کہ مرکزی حکومت سے بات چیت تقریباً دو ماہ قبل اس مقام پر پہنچی تھی جہاں اصل مطالبات پر گفتگو شروع ہونے والی تھی، لیکن اس کے بعد کوئی میٹنگ نہیں بلائی گئی۔
وانگچک نے کہا کہ عنقریب لہیہ ہل کونسل کے انتخابات ہونے جا رہے ہیں اور بھارتیہ جنتا پارٹی (بی جے پی) نے پچھلے کونسل انتخابات کے دوران لداخ کو چھٹے شیڈول کا درجہ دینے کا وعدہ کیا تھا۔ یہ وعدہ آئندہ انتخابات سے قبل پورا کیا جانا چاہئے ۔
انہوں نے مزید کہا کہ یہ بھوک ہڑتال۳۵دن جاری رہے گی اور ۲؍اکتوبر کو گاندھی جینتی کو ان کے احتجاج میں ایک اہم سنگ میل کے طور پر منایا جائے گا۔
وانگچک کے مطابق لہیہ ایپکس باڈی نے واضح پیغام دیا ہے کہ ان کا احتجاج پُرامن اور عدم تشدد پر مبنی ہے اور ان کے مطالبات آئین ہند کی حدود میں ہیں۔