ہندوستان اور یورپی یونین مل کر دہشت گردی کے خلاف آواز اٹھائیں گے

نئی دہلی، 10 ستمبر (یو این آئی) ہندوستان اور یورپی یونین نے پہلگام دہشت گردانہ حملے کی سخت مذمت کی ہے اور اس عالمی چیلنج سے نمٹنے کے لیے اقوام متحدہ،عالمی انسداد دہشت گردی فورم (جی سی ٹی ایف) اور فائننشل ایکشن ٹاسک فورس (ایف اے ٹی ایف) جیسے کثیر جہتی اداروں میں آواز اٹھانے پر اتفاق ظاپر کیا ہے ۔ دونوں فریقوں نے سرحد پار دہشت گردی سمیت ہر قسم کی دہشت گردی کے خلاف مضبوط اور ٹھوس کارروائی کی ضرورت کا اظہار کیا ہے ۔ انہوں نے انسداد دہشت گردی تعاون کو مضبوط بنانے کے طریقوں پر بھی تبادلہ خیال کیا۔
وزارت خارجہ نے بدھ کو یہاں کہا کہ یورپی یونین اور ہندوستان کے انسداد دہشت گردی پر مشترکہ ورکنگ گروپ (سی ٹی) کی 15ویں میٹنگ منگل کو برسلز میں منعقد ہوئی۔ ان مذاکرات کی مشترکہ صدارت وزارت خارجہ میں جوائنٹ سکریٹری (انسداد دہشت گردی) کے ڈی دیول اور یورپی ایکسٹرنل ایکشن سروس میں سکیورٹی اور دفاعی پالیسی کے ڈائریکٹر میکیج اسٹیڈجیک نے کی۔
میٹنگ میں، دونوں فریقوں نے 22 اپریل کو پہلگام میں ہوئے دہشت گردانہ حملے کی مذمت کی اور یورپی یونین نے معصوم شہریوں کی ہلاکت پر ہندوستان کے ساتھ تعزیت کا اعادہ کیا۔ دونوں فریقوں نے سرحد پار دہشت گردی سمیت ہر قسم کی دہشت گردی کی شدید مذمت کی۔ دونوں نے اتفاق کیا کہ دہشت گردی ایک عالمی چیلنج ہے اور اس کے لیے مستقل اور جامع کارروائی کی ضرورت ہے ۔ انہوں نے اقوام متحدہ، عالمی انسداد دہشت گردی فورم (جی سی ٹی ایف) اور فائننشل ایکشن ٹاسک فورس (ایف اے ٹی ایف) جیسے کثیر الجہتی فورمز میں تعاون کی اہمیت پر زور دیا۔
دونوں فریقوں نے ملکی، علاقائی اور عالمی خطرات پر تبادلہ خیال کیا۔ انہوں نے اس بات پر زور دیا کہ دنیا کے مختلف خطوں میں عدم استحکام اور تنازعات دہشت گردی اور پرتشدد انتہا پسندی کو پنپنے کے مواقع فراہم کرتے ہیں۔
یورپی یونین اور ہندوستان نے اپنی متعلقہ انسداد دہشت گردی پالیسیوں کے بارے میں معلومات کا تبادلہ کیا اور دہشت گردی کے خلاف جنگ کے اہم پہلوؤں پر تبادلہ خیال کیا۔ ان میں دہشت گردی کی مالی معاونت کا مقابلہ، آن لائن بنیاد پرستی کو روکنا اور نامزد دہشت گردوں اور دہشت گرد تنظیموں کے بارے میں معلومات کا مسلسل تبادلہ اور ابھرتی ہوئی ٹیکنالوجیز کے استعمال کو روکنے کے اقدامات شامل ہیں۔ دونوں فریقوں نے انسداد دہشت گردی تعاون کو مضبوط بنانے کے طریقوں پر بھی تبادلہ خیال کیا اور مستقبل میں تعاون کے شعبوں کی نشاندہی کی۔
اس بات پر بھی اتفاق کیا گیا کہ جوائنٹ ورکنگ گروپ کی اگلی میٹنگ نئی دہلی میں ہوگی۔