لگاتار دوسرے دن کٹھمنڈو کی پروازیں بند رہیں

نئی دہلی، 10 ستمبر (یواین آئی) نیپال میں جاری تشدد اور دارالحکومت کٹھمنڈو کے ہوائی اڈے کے بند رہنے کے باعث بدھ کے روز مسلسل دوسرے دن ہندوستان سے نیپال جانے والی پروازیں منسوخ رہیں۔
ٹاٹا گروپ کی ایئر انڈیا کے ایک ترجمان نے آج بتایا کہ 10 ستمبر کی دہلی اور کٹھمنڈو کے درمیان تمام پروازیں منسوخ کر دی گئی ہیں۔ ترجمان نے کہا کہ صورتِ حال پر مسلسل نظر رکھی جا رہی ہے اور کمپنی کے لیے مسافروں اور عملے کی حفاظت اولین ترجیح ہے ۔ انہوں نے مسافروں کو 11 ستمبر تک کی پروازوں کے کنفرم ٹکٹ کی تاریخ میں ایک بار مفت تبدیلی کا اختیار دیا ہے ۔
کم لاگت والی ایئر لائن اسپائس جیٹ نے بھی 10 تاریخ کو دہلی اور کٹھمنڈو کے درمیان اپنی پرواز منسوخ کرنے کا اعلان کیا ہے ۔
انڈگو نے بھی ایڈوائزری جاری کرتے ہوئے بتایا کہ اس نے آج شام چھ بجے تک کٹھمنڈو کی اپنی تمام پروازیں منسوخ کر دی ہیں۔ اس نے بھی مسافروں کو 12 ستمبر تک کے ٹکٹ پر تاریخ میں تبدیلی یا ٹکٹ منسوخ کرانے پر سو فیصد فیس چھوٹ دینے کا اعلان کیا ہے ۔
نیپال میں بدعنوانی کے خلاف اور سوشل میڈیا پر پابندی کے خلاف نوجوانوں کا احتجاج پیر کے روز پولیس کی فائرنگ کے بعد پرتشدد ہو گیا تھا۔ منگل کو شدید تشدد اور آگ زنی کے درمیان وزیر اعظم کے پی شرما اولی کو استعفیٰ دینا پڑا۔ آج صورتِ حال میں کچھ بہتری آئی ہے ۔