دہلی میں کالاجتھیڑی گینگ کی سازش ناکام، نریلا سے اسلحہ کے ساتھ دو ساتھی گرفتار

نئی دہلی، 10 ستمبر (یو این آئی) دہلی پولیس کے بیرونی شمالی ضلع کی ٹیم نے بڑی کامیابی حاصل کرتے ہوئے ایک سنگین واردات کو انجام دینے سے قبل ہی ناکام بنا دیا۔ پولیس نے کالا جھتھیڑی گینگ سے وابستہ دو نوجوانوں کو گرفتار کیا ہے جو نریلا علاقے میں اپنے کاروباری حریف کے قتل کی سازش رچ رہے تھے ۔ پولیس نے ان کے قبضے سے ایک جدید پستول،دو کارتوس اور ایک دیسی کٹا (پستول) برآمد کیے ہیں۔
بیرونی شمالی ضلع کے ڈپٹی کمشنر آف پولیس ہریشور وی. سوامی نے بتایا کہ پانچ ستمبر کو پولیس کو مصدقہ اطلاع ملی تھی کہ نریلا میں پانی صاف کرنے کے پلانٹ (واٹر ٹریٹمنٹ پلانٹ) کی ملکیت کے تنازعے کو لے کر کالا جھتھیڑی گینگ کے ارکان ایک شخص کے قتل کی منصوبہ بندی کر رہے ہیں۔ اس پر پولیس انسپکٹر آنند کمار جھا کی قیادت اور اسسٹنٹ کمشنر آف پولیس دنیش کمار کی نگرانی میں ایک ٹیم تشکیل دی گئی۔
پولیس ٹیم نے رات میں خفیہ اطلاع پر نگرانی کرتے ہوئے سابولی بارڈر کے قریب ایک موٹر سائیکل کو روکا۔ سوار کی شناخت اکشت کھتری عرف اکشو (20) کے طور پر ہوئی ہے ، جس کے پاس سے ایک کارتوس ملا۔ موٹرسائیکل پر پیچھے بیٹھے ساحل کھتری (20) کے قبضے سے ایک دیسی کٹا اور کارتوس برآمد ہوا۔
پوچھ گچھ کے دوران ساحل نے انکشاف کیا کہ اس نے جیل میں بند گینگسٹر اکشے پالڑا کے ساتھیوں سے ایک جدید .30 بور پستول خریدا تھا۔ اس کی نشاندہی پر یہ ہتھیار اس کے پانی کے پلانٹ سے برآمد کیا گیا۔
ڈپٹی کمشنر نے کہا کہ اس کارروائی سے ایک بڑی واردات ٹل گئی اور گینگ کے اسلحہ سپلائر نیٹ ورک کو ختم کرنے کے لیے چھاپے مارے جا رہے ہیں۔