خاتون نے چلتی ٹرین کے دوران بچے کو جنم دیا

بانہال/۳ ستمبر
بانہال ریلوے اسٹیشن پر ریلوے عملے نے ایک خاتون مسافر کی مدد کی جس نے آج ٹرین میں بچے کو جنم دیا اور فوراً ماں اور بچے کو قریبی اسپتال منتقل کرنے کا انتظام کیا۔
خاتون، جو سومبر گاؤں کی رہائشی ہے، اپنے شوہر کے ساتھ ٹرین جو سنگلدان سے بارہمولہ جا رہی تھی‘ میں سفر کر رہی تھی جب بانہال پہنچنے کے قریب ہی انہیں شدید دردِ زہ شروع ہوا۔ خواتین ہم سفر مسافروں کی مدد سے ڈبے کے اندر ہی ولادت عمل میں آئی۔
اطلاع ملتے ہی اسٹیشن منیجر اے بی بالی نے فوری طور پر طبی امداد کا انتظام کیا اور ماں اور بچے کو قریبی اسپتال محفوظ طریقے سے منتقل کیا۔ ریلوے پروٹیکشن فورس اور گورنمنٹ ریلوے پولیس نے بھی اس دوران تعاون فراہم کیا۔
سینئر ڈویڑنل کمرشل منیجر، جموں ڈویڑن، اْچِت سنگھل، اور ایریا منیجر، کشمیر ویلی، ثاقب یوسف نے مسافروں اور ریلوے ملازمین کے فوری ردعمل کو سراہا۔ انہوں نے کہا کہ یہ واقعہ ’’انسانیت اور مسافروں و ریلوے عملے کے درمیان ہم آہنگی کی بہترین مثال ہے جو بھارتی ریلوے کی جانوں کے تحفظ کے عزم کی عکاسی کرتا ہے۔‘‘