سیلابی خطرے کے پیشِ نظر، جموںکشمیر میں تمام تعلیمی ادارے بند

سرینگر/۳ ستمبر
خراب موسمی حالات اور سیلاب جیسے حالات کے پیشِ نظر، حکومت نے بدھ کو کہا کہ کشمیر ڈویڑن کے اسکول‘کالیج اور یونیورسٹیاں جمعرات کو بند رہیں گے۔تاہم حکومت نے کہا کہ جموں ڈویڑن میں اسکول جمعہ تک بند رہیں گے۔
ڈویڑنل کمشنر کشمیر، اشول گرگ نے کہا کہ حکومت نے احتیاطی تدبیر کے طور پر کشمیر ڈویڑن میں جمعرات کو اسکولوں‘کالیجوں اور یونیورسٹیوں کو بند رکھنے کا فیصلہ کیا ہے۔
گرگ نے کہا ’’خراب موسمی حالات کے پیشِ نظر، کل ۴ستمبر کو کشمیر کے تمام تعلیمی ادارے احتیاطی اقدام کے طور پر بند رہیں گے۔‘‘
اسی دوران، ڈائریکٹر آف اسکول ایجوکیشن جموں (ڈی ایس ای جے) نے ایک حکم نامے میں کہا کہ خراب موسمی حالات اور سیلاب جیسے حالات کے پیشِ نظر جموں ڈویڑن بھر کے اسکول ۵ ستمبر تک بند رہیں گے۔
ان کاکہنا تھا’’آئی ایم ڈی کی جانب سے جاری موسمی الرٹ کے حوالے سے اور مسلسل بارشوں، بھاری لینڈ سلائیڈز، اچانک سیلاب اور نشیبی علاقوں میں شدید پانی بھراؤ کو مدنظر رکھتے ہوئے، جموں ڈویڑن کے تمام سرکاری و نجی اسکول۵ستمبر۲۰۲۵ تک بند رہیں گے تاکہ طلبہ اور عملے کی حفاظت یقینی بنائی جا سکے‘‘۔
ڈائریکٹوریٹ نے مزید حکم دیا کہ تعلیم کے تسلسل کو برقرار رکھنے کیلئے جہاں ممکن ہو آن لائن کلاسز منعقد کی جائیں۔
ادھرڈائریکٹوریٹ آف کالجز، محکمہ اعلیٰ تعلیم، جموں و کشمیر نے خراب موسمی حالات کے پیشِ نظر جمعرات۴ ستمبر کو یونین ٹیریٹری بھر کے تمام گورنمنٹ ڈگری کالجز، جی سی ای ٹیز اور پرائیویٹ کالجز کو بند رکھنے کا اعلان کیا ہے۔
بدھ کو جاری ایک سرکاری حکم نامے میں ڈائریکٹر آف کالجز، جموں و کشمیر، ڈاکٹر شیخ اعجاز بشیر نے کہا کہ یہ فیصلہ احتیاطی اقدام کے طور پر طلبہ اور عملے کی حفاظت و سلامتی کو یقینی بنانے کے لیے لیا گیا ہے۔
یہ حکم جموں اور کشمیر ڈویڑن کے تمام اعلیٰ تعلیمی اداروں پر یکساں طور پر لاگو ہوگا۔
وادی میںخراب موسمی صورتحال کے پیش نظربدھ کو بھی تمام کالج اور سرکاری و غیر سرکاری اسکول بند رہے ۔
صوبائی کمشنر کشمیر کی طرف سے جاری ایک حکمنامے میں کہا گیاتھا کہ ناساز گار موسمی صورتحال کے پیش نظر کشمیر میں آج یعنی بدھ کو تمام کالج اور اسکول احتیاطی طور پر بند رہیں گے ۔انہوں نے کہا کہ یہ فیصلہ طلبا اور عملے کے تحفظ کے پیش نظر لیا گیا ہے ۔
واضح رہے کہ جموں وکشمیر میں گذشتہ۱۲گھنٹوں سے موسلا دھار بارشوں کا سلسلہ جاری ہے جس سے کئی علاقوں میں ایک بار پھر سیلابی صورتحال پیدا ہوئی ہے ۔حکام نے لوگوں سے احتیاط برتنے کی تاکید کی ہے ۔
ادھر ناساز گار موسمی صورتحال کے پیش نظر کشمیر یونیورسٹی اور کلسٹر یونیورسٹی سری نگر نے آج یعنی بدھ کو ہونے والے تمام امتحانات ملتوی کر دئے گئے تھے۔
کشمیر یونیورسٹی اور کلسٹر یونیورسٹی کے حکام نے بتایا کہ خراب موسمی صورتحال کے پیش نظر ۳ستمبر کو ہونے والے تمام امتحانات ملتوی کر دیے گئے ہیں۔انہوں نے کہا کہ ان پرچوں کے امتحانات کی نئی تاریخوں کا اعلان بعد میں کیا جائے گا۔