ورلڈ کپ سے قبل جنوبی افریقہ کی لیجنڈ کھلاڑی وین نیکرک کی ٹیم میں واپسی

کیپ ٹاؤن، 25 اگست (یواین آئی) آئندہ خواتین ون ڈے ورلڈ کپ سے قبل ریٹائرمنٹ کا اعلان کرچکی جنوبی افریقہ کی نامور کھلاڑی اور سابق کپتان ڈین وین نیکرک کو 20 رکنی اسکواڈ میں شامل کر لیا گیا ہے۔
بین الاقوامی کرکٹ سے 2023 میں ریٹائر ہونے والی ڈین وین نیکرک نے اپنے سوشل میڈیا اکاؤنٹ پر ایک بیان میں لکھا:
“مجھے یہ اعلان کرتے ہوئے بے حد خوشی ہو رہی ہے کہ میں نے بین الاقوامی کرکٹ سے ریٹائرمنٹ کا فیصلہ واپس لینے کا ارادہ کیا ہے۔ اس عرصے نے مجھے یاد دلایا ہے کہ میں نے اپنے ملک کی نمائندگی کو کتنا یاد کیا ہے اور اب ایک بار پھر اس موقع کو حاصل کرنے کے لیے میں اپنی پوری توانائی وقف کرنے کے لیے پرعزم ہوں۔”
جنوبی افریقہ خواتین ٹیم کا قومی تربیتی کیمپ 25 اگست سے ڈربن میں شروع ہوگا اور ستمبر تک جاری رہے گا۔ کیمپ کے اختتام کے بعد ورلڈ کپ کی تیاریوں کے پیشِ نظر جنوبی افریقہ کی ٹیم 16 ستمبر سے شروع ہونے والی تین ون ڈے میچوں کی سیریز کے لیے پاکستان کا دورہ کرے گی۔
20 رکنی کیمپ میں کپتان لورا وولوارڈٹ کے ساتھ آل راؤنڈر کلو ٹرایون اور میریزن کیپ بھی شامل ہیں، جو اس وقت ’دی ہنڈریڈ‘ میں کھیل رہی ہیں۔
اس سال کے آغاز میں انڈر-19 ورلڈ کپ میں جنوبی افریقہ کی نمائندگی کرنے والے ان کیپڈ آل راؤنڈر لوئانڈا نزوزا کو بھی کیمپ میں شامل کیا گیا ہے۔
قومی کیمپ کے لیے جنوبی افریقہ کی خواتین ٹیم درج ذیل ہے:
اینیکے بوش، تاجمن بریٹس، نادین ڈی کلارک، اینیری ڈرکسن، لارا گوڈال، آیاندا ہلوبی، سنالو جافتا، آیابونگا کھاکا، مساباتا کلاس، سنے لوس، ایلیز-ماری مارکس، کارابو میسو، نونکولولیکو ملبا، سیشنی نائیڈو، لوئانڈا نزوزا، تومی سیکھوکھونے، نونڈومیسو شینگسے، میانے اسمیٹ، فے ٹونی کلف اور ڈین وین نیکرک۔