سرینگر؍۳۰؍اکتوبر
سرینگر ٹریفک پولیس نے ہفتہ۳۱؍اکتوبر کو ’راشٹریہ ایکتا دیوس‘ اور ’رن فار یونٹی‘ تقریب کے پیش نظر ٹریفک ایڈوائزری جاری کی ہے۔ یہ تقریب شیرِ کشمیر انٹرنیشنل کانفرنس سینٹر (ایس کے آئی سی سی) اور بوٹینیکل گارڈن کے درمیان منعقد ہوگی۔
ٹریفک ایڈوائزری کے مطابق تقریب میں مختلف شعبہ ہائے زندگی سے تعلق رکھنے والی کئی اہم شخصیات اور شرکاء کی شرکت متوقع ہے۔ ٹریفک کی روانی برقرار رکھنے اور بھیڑ بھاڑ سے بچنے کے لیے متعدد سڑکوں پر پابندیاں اور راستوں میں تبدیلیاں نافذ کی جائیں گی۔
بلیوارڈ روڈ پر لالیت گھاٹ سے کرال سنگری تک ہفتہ کی صبح۸:۳۰ بجے سے تقریب کے اختتام تک ٹریفک کی آمد و رفت محدود رہے گی۔
نشاط، شالیمار اور ہارون کی طرف جانے والے گاڑی سواروں کو بلیوارڈ روڈ کے بجائے ڈل گیٹ، رعناواری اور حضرت بل کا راستہ اختیار کرنے کا مشورہ دیا گیا ہے۔
اسی طرح ہارون، شالیمار اور نشاط سے لال چوک کی طرف جانے والے مسافروں کو نشاط۔بلیوارڈ روڈ کے بجائے فُرشور۔حضرت بل کا راستہ اختیار کرنے کی ہدایت دی گئی ہے۔
گلاب باغ، زکورہ، نسیم باغ، حبک اور ملحقہ علاقوں سے لال چوک جانے والے افراد کو فُرشور روڈ کے بجائے حبک، درگاہ اور خانیار کا راستہ استعمال کرنے کا مشورہ دیا گیا ہے۔
۔۔۔۔۔۔(ایجنسیاں )
