ہماری ٹیم راجگیر میں بہترین کارکردگی کا مظاہرہ کرے گی: ہرمن پریت سنگھ

راجگیر، 25 اگست (یو این آئی) ہندوستانی مردوں کی ہاکی ٹیم کے کپتان ہرمن پریت سنگھ نے پیر کو کہا کہ ہندوستانی ٹیم کسی بھی ٹیم کو ہلکے میں نہیں لے رہی ہے، ٹیم ٹورنامنٹ میں اپنی بہترین کارکردگی کا مظاہرہ کرے گی۔ انہوں نے عمدہ کارکردگی دکھانے کے عزم کا اظہار کرتے ہوئے کہا کہ ٹیم کا اعتماد بلند ہے۔ہم اس موقع کا فائدہ اٹھائیں گے ۔
آج یہاں ایشیا کپ 2025 کے لیے راجگیر، بہار میں ہندوستانی مردوں کی ہاکی ٹیم کی آمد پر، ہرمن پریت نے کہا ہم نے بہار میں پہلے کبھی نہیں کھیلا ہے اور یہ دیکھ کر بہت خوشی ہوئی ہے کہ راجگیر ایک سال کے اندر اپنے دوسرے بین الاقوامی ہاکی ٹورنامنٹ کی میزبانی کر رہا ہے۔ انہوں نے کہا کہ ہندوستان نے جکارتہ میں منعقدہ گزشتہ ایڈیشن میں کانسی کا تمغہ جیتا تھا، جہاں 15 نئے کھلاڑیوں کے ساتھ ایک نوجوان ٹیم نے پوڈیم پر جگہ حاصل کرکے اپنی مہم میں جوش دکھایا۔ تاہم اس بار ورلڈ کپ کوالیفیکشن داؤ پر لگی ہوئی ہے،اس لئے ہمارے پاس بہتریں کھیل پیش کرنے کا موقع ہرگا۔
دریں اثنا، ہندوستانی ٹیم کے ہیڈ کوچ کریگ فلٹن نے پہلی بار بہار میں کھیلنے پر اپنی خوشی کا اظہار کرتے ہوئے کہا، "ہم اس باوقار ٹورنامنٹ کے لیے بہار میں آکر بہت خوش ہیں، یہ بڑی بات ہے کہ یہاں بین الاقوامی ہاکی کی میزبانی کی جارہی ہے اور ہم اس خطے کے لوگوں کو اپنے کھیل سے متاثر کرنا چاہتے ہیں۔ اس ٹورنامنٹ کے لیے ٹیم کی تیاری اسی طرح ٹھوس ہوگی۔ ہندوستان کو جاپان، چین اور قازقستان کے ساتھ پول اے میں رکھا گیا ہے جبکہ پول بی میں ملائیشیا، کوریا، بنگلہ دیش اور چائنیز تائپے شامل ہیں