ہندوستانی مردوں کی ٹیم کامن ویلتھ کبڈی چیمپئن شپ کے فائنل میں پہنچ گئی

احمدآباد، 31 اکتوبر (یواین آئی) ہندوستانی مردوں کی ٹیم نے سیمی فائنل میں بنگلہ دیش کو 56-27 سے شکست دے کر کامن ویلتھ کبڈی چیمپئن شپ کے فائنل میں جگہ بنا لی ہے، جہاں اس کا سامنا سری لنکا سے ہوگا۔ سری لنکا نے دوسرے سیمی فائنل میں کینیا کو 28-24 سے شکست دی۔
احمدآباد کے ویر ساورکر اسپورٹس کمپلیکس میں جمعہ کو کھیلے گئے سیمی فائنل میں ہندوستان نے ابتدا ہی سے میچ پر گرفت مضبوط رکھی۔ نوین کمار اور نیرج نروال نے ریڈنگ میں جبکہ دیپک ایس اور شبھم شندے نے دفاع میں ٹیم کی قیادت کی۔ بنگلہ دیش کی جانب سے دیپایون گولڈر نے کامیاب ریڈ کے ذریعے کھاتہ کھولا، لیکن ہندوستان نے جلد ہی مقابلے کا رخ اپنے حق میں کرلیا اور ابتدائی پانچ منٹ میں پہلا آل آؤٹ کر دیا۔
بھرت ہڈا اور شیوم پٹارے نے ریڈنگ کی ذمہ داری سنبھالی، جبکہ دیپک ایس نے دفاع میں شاندار کارکردگی جاری رکھی۔ پہلے ہاف میں آٹھ منٹ باقی رہتے ہندوستان نے دوسرا آل آؤٹ کیا اور ہاف ٹائم تک 28-8 کی مضبوط برتری حاصل کرلی۔ بنگلہ دیش ہندوستانی دفاع کو توڑنے میں ناکام رہا اور پہلے ہاف میں اسے ایک بھی ٹیکل پوائنٹ نہیں ملا۔ بنگلہ دیش کے لیے دیپایون گولڈر اور ایم ڈی رحمان نے ریڈ کے ذریعے پوائنٹ حاصل کیے۔
دوسرے ہاف میں بھی ہندوستان نے اپنی برتری برقرار رکھی اور میچ میں 10 منٹ باقی رہتے 38-16 کی سبقت حاصل کرلی۔ بھرت ہڈا بنگلہ دیش کے دفاع کے لیے مسلسل مشکل بنے رہے اور میچ ختم ہونے سے چار منٹ قبل ہندوستان نے ایک اور آل آؤٹ کرتے ہوئے اسکور 49-20 کردیا۔ ہندوستان نے آخرکار 56-27 سے یکطرفہ کامیابی حاصل کی۔ ہندوستان نے 37 ریڈ پوائنٹ، 12 ٹیکل پوائنٹ اور آل آؤٹ سے چھ پوائنٹ حاصل کیے۔
بھرت ہڈا ہندوستان کی جانب سے 13 پوائنٹ کے ساتھ سب سے کامیاب رہے، جبکہ شیوم پٹارے نے 11 اور نیرج نروال نے نو پوائنٹ حاصل کیے۔ دفاع میں اجیت پوار نے بھی اہم کردار ادا کرتے ہوئے آٹھ ٹیکل کوششوں میں پانچ ٹیکل پوائنٹ حاصل کیے۔
دوسرے سیمی فائنل میں سری لنکا نے سخت مقابلے میں کینیا کو 28-24 سے شکست دے کر فائنل میں جگہ بنائی۔ سری لنکا کے ملندا چتورنگا اور سابہان نے چھ، چھ پوائنٹ حاصل کیے، جبکہ ودورنگا نے چار پوائنٹ بنائے۔ دفاع میں مادے دویکی سنجے نے پانچ ٹیکل پوائنٹ کے ساتھ اہم کردار ادا کیا۔ کینیا کی جانب سے ہیلوک وانجالا نے نو اور سیموئیل وافولا نے چھ پوائنٹ حاصل کیے۔
کپتان سریجیت سنگھ نے کہا کہ پہلی کامن ویلتھ کبڈی چیمپئن شپ کے فائنل میں پہنچنا ٹیم کے لیے فخر کا لمحہ ہے۔ انہوں نے کہا کہ ٹیم کا حوصلہ بلند ہے اور وہ ناقابل شکست مہم جاری رکھتے ہوئے خطاب جیتنے کے لیے پرعزم ہے۔ انہوں نے 13 ممالک کی شرکت والے اس ٹورنامنٹ کو بین الاقوامی سطح پر کبڈی کے فروغ کی سمت اہم قدم قرار دیتے ہوئے افریقی ٹیموں کی کارکردگی کو حوصلہ افزا بتایا اور پرو کبڈی لیگ جیسے مقابلوں میں ان کھلاڑیوں کو زیادہ مواقع دینے کی ضرورت پر زور دیا۔
ہندوستانی مردوں کی ٹیم ہفتہ کی رات نو بجے کامن ویلتھ کبڈی چیمپئن شپ 2026 کے فائنل میں سری لنکا کا سامنا کرے گی، جہاں اس کی نظریں پہلی بار منعقد ہونے والی اس چیمپئن شپ کا خطاب جیتنے پر ہوں گی۔